കൊച്ചി: മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കര്‍ അറസ്റ്റിലായതോടെ കൂടുതല്‍ ഉന്നതര്‍ക്കായി വലവിരിക്കാനൊരുങ്ങി കേന്ദ്ര ഏജന്‍സികള്‍. ഒരു മന്ത്രിയടക്കം ചില ഉന്നതരെ ഇഡിയും കസ്റ്റംസും അടുത്തയാഴ്ച ചോദ്യം ചെയ്യും. നേരത്തെ ഇഡിയും എന്‍ഐഎയെയും ചോദ്യം ചെയ്ത മന്ത്രി കെടി ജലീലിന് പുറമെ ഒരു മന്ത്രികൂടി ആരോപണങ്ങളുടെ പുതിയ പട്ടികയില്‍ സ്ഥാനം പിടിച്ചിരിക്കുകയാണ്.
ഇത്രയും ദിവസം നടന്ന എം ശിവശങ്കറിന്റെ ചോദ്യം ചെയ്യലുകളില്‍ നിന്നും വ്യത്യസ്തമാണ് കസ്റ്റഡിയിലുള്ള ചോദ്യം ചെയ്യല്‍. കഴിഞ്ഞ 105 ദിവസമായി 93 മണിക്കൂര്‍ ശിവശങ്കറിനെ ചോദ്യം ചെയ്തപ്പോള്‍ അറിയില്ല, പറയാന്‍ തല്‍ക്കാലം ഉദ്ദേശിക്കുന്നില്ല എന്നൊക്കെയായിരുന്നു ശിവശങ്കര്‍ പറഞ്ഞ മറുപടി.
ശിവശങ്കര്‍ പലതും ഇഡിക്ക് മുന്നില്‍ തുറന്നു പറയുമോയെന്ന ആശങ്ക ഇപ്പോള്‍ തന്നെ സര്‍ക്കാരിനും സിപിഎമ്മിനും ഉണ്ട്. കള്ളപ്പണ ഇടപാടുമായി ബന്ധപ്പെട്ട് ഇഡി നടത്തിയ അന്വേഷണത്തില്‍ മുഖ്യമന്ത്രിയുടെ ഓഫീസിലെ രണ്ടു പേര്‍ക്ക് കൂടി ഈ ഇടപാടുകളില്‍ പങ്കാളിത്തമുണ്ടെന്ന നിഗമനത്തിലാണ്. ഇതില്‍ ഒരാള്‍ രാഷ്ട്രീയ നിയമനമാണ്.
പാര്‍ട്ടി മുഖ്യമന്ത്രിയുടെ ഓഫീസില്‍ നിയമിച്ച ഒരാള്‍കൂടി ആരോപണത്തലേക്ക് വരുന്നത് കൂടുതല്‍ ഗൗരവമായ കാര്യമാകും. ഇതിനു പുറമെയാണ് ഒരു മന്ത്രിയെകൂടി ചോദ്യം ചെയ്യാന്‍ അന്വേഷണ ഏജന്‍സികള്‍ തീരുമാനിച്ചിട്ടുള്ളത്. നേരത്തെ കേസില്‍ ഉന്നതവിദ്യാഭ്യാസമന്ത്രി കെടി ജലീലിനെ ഇഡി രണ്ടുതവണയും എന്‍ഐഎ ഒരു തവണയും ചോദ്യം ചെയ്തിരുന്നു.
