എടപ്പാള് : എടപ്പാള് മേല്പാലത്തിലെ ഭാര പരിശോധനയുടെ അന്തിമഫലം ഞായറാഴ്ച അറിയാം. വെള്ളിയാഴ്ച രാത്രി മുതല് 30 ടണ്ണിന്റെ നാല് ടോറസ് ലോറികള് 24 മണിക്കൂര് പാലത്തില് നിര്ത്തി ഭാര പരിശോധന നടത്തി. ഒരു മണിക്കൂര് ഇടവിട്ടാണ് നാല് വാഹനങ്ങളും നിര്ത്തിയത്. ഇതിനുശേഷം പരിശോധന നടത്തി റീഡിങ് രേഖപ്പെടുത്തി. ഇനി ഭാരമില്ലാതെയും 24 മണിക്കൂര് നിരീക്ഷിക്കും. നേരത്തേയുണ്ടായ താഴ്ച പൂര്വസ്ഥിതിയിലാകുന്നുണ്ടോയെന്നും മീറ്ററില് രേഖപ്പെടുത്തും. ഗ്രേസ് എന്റര്പ്രൈസസാണ് ഭാരപരിശോധന നടത്തുന്നത്.
ഭാരശേഷി അളക്കാനുള്ള മീറ്ററുകള് പാലത്തിനടിയിലാണ് ഘടിപ്പിച്ചിരിക്കുന്നത്. മില്ലീ മീറ്ററിന്റെ നൂറിലൊരംശം വരെ രേഖപ്പെടുത്താന് കഴിവുള്ള സെന്സര് അധിഷ്ഠിത പത്ത് മീറ്ററുകളാണ് ഇവ. ഒരേ സമയം 120 ടണ് ഭാരം പാലത്തിന്റെ മധ്യഭാഗത്ത് ഓരോ മണിക്കൂര് ഇടവിട്ട് നിര്ത്തിയാണ് പരിശോധന നടന്നത്. ഏതെങ്കിലും സാഹചര്യത്തില് പാലം മുഴുവന് വാഹനങ്ങള് നിര്ത്തിയിടേണ്ടി വരും വിധം ഗതാഗതക്കുരുക്കുണ്ടായാല് പോലും ബലക്ഷയമുണ്ടാകില്ലെന്ന് കൂടി ഇതിലൂടെ ഉറപ്പാക്കും. ഞായറാഴ്ച വൈകീട്ട് ആറോടെ അന്തിമ പരിശോധന നടത്തി റീഡിങ് രേഖപ്പെടുത്തും.
