ബെംഗലുരു: ബെംഗലുരുവില് വീടിന് മുന്നില് വളര്ത്തുനായ മലമൂത്ര വിസര്ജ്ജനം നടത്തിയത് ചോദ്യം ചെയ്ത 68കാരനെ കൊലപ്പെടുത്തി. 68കാരനായ മുനിരാജുവാണ് കൊല്ലപ്പെട്ടത്. രവി കുമാര്, പല്ലവി, പ്രമോദ് എന്നിവര് ചേര്ന്നാണ് ഇയാളെ കൊലപ്പെടുത്തിയത്. രവികുമാറിന്റെയും പല്ലവിയുടേയും നായ മുനിരാജുവിന്റെ വീടിന് മുന്നില് മലമൂത്രവിസര്ജ്ജനം നടത്തിയിരുന്നു. ഇതേ തുടര്ന്നുള്ള തര്ക്കമാണ് കൊലപാതകത്തിലേക്ക് നയിച്ചത്. ക്രിക്കറ്റ് ബാറ്റെടുത്താണ് മുനിരാജുവിനെ അക്രമിച്ച് കൊന്നത്.
സോളദേവനഹള്ളിയിലെ ഗണപതി നഗറിലാണ് മുനിരാജുവിന്റെ വീട്. മുനിരാജുവിന്റെ മകന് മുരളിയും രവികുമാറും തമ്മില് നേരത്തെ തര്ക്കം നിലനിന്നിരുന്നു. കഴിഞ്ഞ വര്ഷം വിറ്റ ഒരു കാറിനെ ചൊല്ലിയായിരുന്നു ഇത്. ഈ കാറിന്റെ ലോണ് തിരിച്ചടവ് മുടങ്ങിയതിന് പിന്നാലെ കാര് പിടിച്ചെടുത്തിരുന്നു. ഇതിന് പിന്നാലെ ഇവര്ക്കിടയില് ശത്രുത ഉടലെടുത്തിരുന്നു. രവികുമാര് തന്റെ നായയെ മലമൂത്ര വിസര്ജനം ചെയ്യാനായി മുനിരാജുവിന്റെ വീടിന് അടുത്തേക്ക് കൊണ്ടുവരുന്നതും തര്ക്കത്തിന് കാരണമായിരുന്നു. ഇതേക്കുറിച്ച് മുനിരാജു പോലീസിലും പരാതിപ്പെട്ടിരുന്നു.
