കോഴിക്കോട്: തൊട്ടില്പാലത്തെ വയോധികയുടെ മരണം കൊലപാതകമാണെന്ന് പോലീസ്. തൊട്ടില്പ്പാലം പൂക്കാട് കണ്ടോത്തറമ്മല് ഖദീജയെയാണ് (78) വീടിനകത്ത് ദുരൂഹ സാഹചര്യത്തില് മരിച്ച നിലയില് കണ്ടെത്തിയത്. ഇവരുടെ നെഞ്ചിലേറ്റ ശക്തമായ ക്ഷതമാണ് മരണകാരണമെന്ന് പോസ്റ്റ്മോര്ട്ടം റിപ്പോര്ട്ടില് പറയുന്നു. ഇന്നു പുലര്ച്ചെ രണ്ട് മണിയോടെ ഖദീജയുടെ മകള് അസ്മയുടെ കരച്ചില് കേട്ടാണ് അയല്വാസികള് ഓടിയെത്തിയത്. കിടപ്പുമുറിയില് നിലത്ത് വായില് നിന്നും മൂക്കില് നിന്നും രക്തം പുറത്തു വന്ന നിലയില് അനക്കമില്ലാതെ കിടക്കുകയായിരുന്നു.
നെഞ്ചിലേറ്റ ശക്തമായ ക്ഷതത്തെ തുടര്ന്ന് ഇരു ഭാഗത്തേയും വാരി എല്ലുകള് ഒടിഞ്ഞുണ്ടായ ആന്തരിക രക്തസ്രാവമാണ് മരണത്തിനിടയാക്കിയതെന്നാണ് പ്രാഥമിക പോസ്റ്റ് മോര്ട്ടം റിപ്പോര്ട്ട്. മാനസിക അസ്വാസ്ഥ്യമുള്ള പേര മകളുടെ അക്രമത്തിനിടയിലാണ് ഖദീജ കൊല്ലപ്പെട്ടത്. ഇവര് ചികിത്സയിലാണ്. ഖദീജയുടെ പേര മകളുടെ മാനസിക നില തൃപ്തികരമായാല് 302 വകുപ്പനുസരിച്ച് പ്രതിക്കെതിരെ കൊലക്കുറ്റം ചുമത്തി അറസ്റ്റ് രേഖപ്പെടുത്തും. നിലവില് അസ്വാഭാവിക മരണത്തിനാണ് പോലീസ് കേസ് രജിസ്റ്റര് ചെയ്തിരിക്കുന്നത്.