തിരുവനന്തപുരം: തെരഞ്ഞെടുപ്പില് മത്സരിക്കുന്ന സ്ഥാനാര്ത്ഥികളുടെ ക്രിമിനല് പശ്ചാത്തലം മാധ്യമങ്ങളിലൂടെ പ്രസിദ്ധീകരിക്കുന്നതു സംബന്ധിച്ചു തെരഞ്ഞെടുപ്പ് കമ്മീഷന് പുതുക്കിയ മാര്ഗനിര്ദേശം പുറത്തിറക്കി.
പുതിയ നിര്ദേശമനുസരിച്ച് സ്ഥാനാര്ത്ഥികള്ക്കു ക്രിമിനല് പശ്ചാത്തലമുണ്ടെങ്കില് അതിന്റെ വിവരങ്ങള് സ്ഥാനാര്ത്ഥികളും രാഷ്ട്രീയ പാര്ട്ടികളും മൂന്നു തവണ മാധ്യമങ്ങളില് പ്രസിദ്ധീകരിക്കണം.
നാമനിര്ദേശ പത്രിക പിന്വലിക്കുന്ന അവസാന ദിവസത്തിനു മുമ്പുള്ള ആദ്യ നാലു ദിവസത്തിനുള്ളില് ആദ്യത്തെയും അഞ്ചു മുതല് എട്ടു വരെയുള്ള ദിവസത്തിനുള്ളില് രണ്ടാമത്തെയും പ്രസിദ്ധീകരണം നടത്തണം. പ്രചരണം അവസാനിക്കുന്നതിന്റെ ഒമ്പതു ദിവസം മുമ്പു മുതല് വോട്ടെടുപ്പിനു രണ്ടു ദിവസം മുമ്പു വരെ അവസാനത്തെ അറിയിപ്പു നല്കാം.
എതിരില്ലാതെ തെരഞ്ഞെടുക്കപ്പെടുന്നവരും അവരെ നാമനിര്ദേശം ചെയ്ത രാഷ്ട്രീയ പാര്ട്ടികളും സ്ഥാനാര്ത്ഥിയുടെ ക്രിമിനല് പശ്ചാത്തലം സംബന്ധിച്ച വിവരങ്ങള് പ്രസിദ്ധീകരിക്കണമെന്നും നിര്ദ്ദേശിച്ചിട്ടുണ്ട്.
