ന്യൂഡല്ഹി : നിയമസഭ തെരഞ്ഞെടുപ്പ് നടക്കുന്ന അഞ്ച് സംസ്ഥാനങ്ങളില് കോവിഡ് വ്യാപനം കണക്കിലെടുത്ത് റാലികള്ക്ക് ഏര്പ്പെടുത്തിയ വിലക്ക് പുനഃപരിശോധിക്കാന് തിങ്കളാഴ്ച തെരഞ്ഞെടുപ്പ് കമീഷന് യോഗം. പരസ്യ പ്രചാരണത്തിനുള്ള നിയന്ത്രണങ്ങളില് കൂടുതല് ഇളവുകളും യോഗം പരിഗണിക്കും. ഉത്തര്പ്രദേശ്, ഉത്തരാഖണ്ഡ്, ഗോവ, പഞ്ചാബ്, മണിപ്പൂര് സംസ്ഥാനങ്ങളിലേക്ക് തെരഞ്ഞെടുപ്പ് പ്രഖ്യാപിച്ച ജനുവരി എട്ടിന് പ്രചാരണ റാലികള്ക്കും റോഡ്ഷോകള്ക്കും വിലക്ക് ഏര്പ്പെടുത്തിയിരുന്നു. ജനുവരി 22ന് ചേര്ന്ന കമീഷന് യോഗം വിലക്ക് 31 വരെ നീട്ടി. എന്നാല് ആദ്യ രണ്ടു ഘട്ട തെരഞ്ഞെടുപ്പ് നടക്കുന്ന മണ്ഡലങ്ങളില് 500 പേരില് കൂടാതെ പൊതുയോഗങ്ങള്ക്ക് അനുമതി നല്കി. വിലക്ക് ഇന്ന് അവസാനിക്കാനിരിക്കെയാണ് പുനഃപരിശോധന.
