തിരുവനന്തപുരം: നിയമസഭാ തെരഞ്ഞെടുപ്പിന്റെ വോട്ട് എണ്ണല് ദിവസമായ ഞായറാഴ്ച കര്ശന സുരക്ഷ ഏര്പ്പെടുത്തിയതായി സംസ്ഥാന പോലീസ് മേധാവി ലോക്നാഥ് ബെഹ്റ. വോട്ടെണ്ണല് ദിനത്തില് 3,332 കേന്ദ്രസായുധ പോലീസ് സേനാംഗങ്ങള് ഉള്പ്പെടെ 30,281 പോലീസുകാരാണ് ഡ്യൂട്ടിയിലുണ്ടാവുക. 140 വോട്ടെണ്ണല് കേന്ദ്രങ്ങളിലായി 49 കമ്പനി കേന്ദ്ര പോലീസ് സേനാംഗങ്ങളേയും നിയോഗിച്ചിട്ടുണ്ട്.
വോട്ടെണ്ണല് തീരുന്നതുവരെ കൗണ്ടിംഗ് കേന്ദ്രങ്ങളില് ശക്തമായ സുരക്ഷയുണ്ടാകും. നേരത്തേ രാഷ്ട്രീയ, സാമുദായിക സംഘര്ഷം ഉണ്ടായ സ്ഥലങ്ങളില് പ്രത്യേക ശ്രദ്ധയുണ്ടാവും. ആവശ്യമെങ്കില് മുന്കരുതല് അറസ്റ്റുകള് നടത്താന് ജില്ലാ പോലീസ് മേധാവിമാര്ക്ക് നിര്ദ്ദേശം നല്കി. വിജയാഘോഷ പ്രകടനങ്ങള് നിരോധിച്ചിരിക്കുന്ന സാഹചര്യത്തില് വോട്ടെണ്ണല് കേന്ദ്രത്തിനു മുന്പില് ജനക്കൂട്ടം ഉണ്ടാകാതെ നോക്കാനും നിര്ദ്ദേശിച്ചിട്ടുണ്ട്.
കോവിഡ് സുരക്ഷാമാനദണ്ഡങ്ങള് പാലിക്കുന്നതിനായി കേന്ദ്ര ഇലക്ഷന് കമ്മീഷന് പുറപ്പെടുവിച്ച നിര്ദ്ദേശങ്ങള് കര്ശനമായി പാലിക്കാനും ജില്ലാ പോലീസ് മേധാവിമാരോട് ആവശ്യപ്പെട്ടിട്ടുണ്ട്. നിരത്തുകളിലെ വാഹനപരിശോധനയും മറ്റും ശനിയാഴ്ച വൈകുന്നേരം തന്നെ ആരംഭിക്കും. ഈ ദിവസങ്ങളില് സംസ്ഥാന അതിര്ത്തികളില് പ്രത്യേക പരിശോധനയ്ക്കും നിര്ദ്ദേശം നല്കിയിട്ടുണ്ട്.
