തിരുവനന്തപുരം : ലോക്സഭാ തെരഞ്ഞെടുപ്പിലെ കനത്ത തിരിച്ചടിക്ക് പിന്നാലെ പരാജയ കാരണങ്ങൾ വിശകലനം ചെയ്യാൻ ചേർന്ന സിപിഎം സംസ്ഥാന കമ്മിറ്റി യോഗം ഇന്ന് സമാപിക്കും. തെരഞ്ഞെടുപ്പിൽ ഭരണവിരുദ്ധ വികാരം പ്രതിഫലിച്ചിട്ടില്ല എന്ന പാർട്ടി സംസ്ഥാന സെക്രട്ടറി എം.വി. ഗോവിന്ദന്റെ റിപ്പോർട്ടിലെ പരാമർശത്തെ ചൊല്ലി യോഗത്തിൽ വലിയ ചർച്ചകളാണ് നടക്കുന്നത്. സർക്കാരിനെതിരായ വികാരം ജനങ്ങൾക്കിടയിൽ ഇല്ലെന്നും ഭരണവിരുദ്ധ തരംഗമല്ല പരാജയത്തിന് കാരണമെന്നുമാണ് എം.വി. ഗോവിന്ദൻ അവതരിപ്പിച്ച റിപ്പോർട്ടിൽ വ്യക്തമാക്കുന്നത്. എന്നാൽ, സർക്കാർ പല വിഷയങ്ങളും കൈകാര്യം ചെയ്ത രീതി ശരിയായില്ലെന്നും ജനങ്ങൾക്കിടയിൽ വലിയ തോതിലുള്ള എതിർപ്പും അവമതിപ്പും നിലനിൽക്കുന്നുണ്ടെന്നും സംസ്ഥാന കമ്മിറ്റി അംഗങ്ങൾ ചൂണ്ടിക്കാട്ടി.
പാർട്ടിയിൽ തിരുത്തൽ നടപടികൾ ആവശ്യമാണെന്നും അത് സംസ്ഥാന നേതൃത്വം മുതൽ താഴെത്തട്ട് വരെ ഉണ്ടാകണമെന്നും ചർച്ചയിൽ ആവശ്യമുയർന്നു. പാർട്ടിയുടെ പ്രവർത്തന ശൈലിയിൽ തുറന്ന സമീപനം സ്വീകരിക്കണമെന്നും അംഗങ്ങൾ അഭിപ്രായപ്പെട്ടു. എൽഡിഎഫ് ഘടകകക്ഷിയായ സിപിഐയുടെ നിലപാടുകൾ പലപ്പോഴും യുഡിഎഫിന് ശക്തി പകരുകയാണ് ചെയ്തതെന്ന് യോഗത്തിൽ വിമർശനമുയർന്നു.
സിപിഎം-ബിജെപി ഡീൽ എന്ന ആരോപണത്തിന് ശക്തി പകരുന്ന തരത്തിലായിരുന്നു സിപിഐയുടെ ചില വാദങ്ങൾ എന്നും, കേരള കോൺഗ്രസ് എം മുന്നണി വിടുമെന്ന ധാരണയെ പ്രതിരോധിക്കാൻ കഴിയാതിരുന്നത് എൽഡിഎഫിന്റെ വിശ്വാസ്യതയെ ബാധിച്ചതായും വിമർശനമുണ്ട്. ഇന്ന് ഉച്ചയോടെ സംസ്ഥാന കമ്മിറ്റി യോഗം അവസാനിക്കും. യോഗ തീരുമാനങ്ങളെക്കുറിച്ച് വിശദീകരിക്കാനായി വൈകുന്നേരം എം.വി. ഗോവിന്ദൻ മാധ്യമങ്ങളെ കാണാൻ സാധ്യതയുണ്ട്. ഒപ്പം പ്രതിപക്ഷ നേതാവിനെ തീരുമാനിക്കുന്ന കാര്യത്തിലും ഇന്നത്തെ യോഗത്തിൽ ധാരണയായേക്കും.
