ഡല്ഹി : തിരഞ്ഞെടുപ്പുബോണ്ട് പദ്ധതി സുപ്രീംകോടതി റദ്ദാക്കിയ ഫെബ്രുവരി 15 വരെ 22,217 ബോണ്ടുകള് വാങ്ങിയെന്നും ഇതില് 22,030 എണ്ണം പാര്ട്ടികള് പണമാക്കി മാറ്റിയെന്നും എസ്.ബി.ഐ. ബാക്കിയുള്ള ബോണ്ടുകള് അനുവദനീയ കാലാവധിയായ 15 ദിവസം കഴിഞ്ഞപ്പോള് പ്രധാനമന്ത്രിയുടെ ദുരിതാശ്വാസനിധിയിലേക്ക് കൈമാറിയെന്നും ബാങ്ക് സുപ്രീംകോടതിയെ അറിയിച്ചിട്ടുണ്ട്. രേഖകള് കൈമാറിയെന്നുകാട്ടി എസ്.ബി.ഐ. ബുധനാഴ്ച സുപ്രീംകോടതിയില് നല്കിയ സത്യവാങ്മൂലത്തിലാണ് ഈ വിവരങ്ങളുള്ളത്. ചൊവ്വാഴ്ച പ്രവൃത്തിസമയത്തിനകം വിവരങ്ങള് നല്കണമെന്ന കോടതിയുത്തരവ് പാലിച്ചെന്നും എസ്.ബി.ഐ. ചെയര്മാന് ദിനേശ് കുമാര് ഖാര നല്കിയ സത്യവാങ്മൂലത്തില് പറയുന്നു.
എസ്.ബി.ഐ. കൈമാറിയ വിവരങ്ങള് കേന്ദ്ര തിരഞ്ഞെടുപ്പ് കമ്മിഷന് വെള്ളിയാഴ്ച പരസ്യപ്പെടുത്തും. വൈകീട്ട് അഞ്ചിനകം വെബ്സൈറ്റില് പ്രസിദ്ധീകരിക്കണമെന്നാണ് കോടതി നിര്ദേശം. ബോണ്ട് വാങ്ങിയവരുടെയും സ്വീകരിച്ച പാര്ട്ടികളുടെയും വിവരങ്ങള് പ്രത്യേകം ഫയലുകളായാണ് ബാങ്ക് തിരഞ്ഞെടുപ്പുകമ്മിഷന് നല്കിയത്. എല്ലാ വിവരങ്ങളും സമയബന്ധിതമായി പുറത്തുവിടുമെന്ന് മുഖ്യ തിരഞ്ഞെടുപ്പ് കമ്മിഷണര് രാജീവ് കുമാര് പറയുന്നു.
