ചെങ്ങന്നൂർ : ചെങ്ങന്നൂർ റെയിൽവേ സ്റ്റേഷന് തെക്ക് മേൽപ്പാലത്തിനു താഴെ രാത്രി കാലങ്ങളിൽ ഉണ്ടായിരുന്ന വെളിച്ച കുറവിന് പരിഹാരമാകുന്നു. മഴക്കാലത്ത് മേൽപ്പാലത്തിന്റെ അടിവശത്തുണ്ടാകുന്ന വെള്ളക്കെട്ടും സമീപത്തെ വഴിവിളക്കുകളുടെ വെളിച്ചം പാലത്തിന് അടിയിലേക്ക് എത്താത്തതിനാലും ഉണ്ടാകുന്ന ഇരുട്ടും കാൽനടയാത്രക്കാർക്ക് ഏറെ ബുദ്ധിമുട്ടുകൾ ശ്രിഷ്ടിച്ചിരുന്നു. മേല്പ്പാലത്തിന് താഴെ വെളിച്ചം ലഭിക്കത്തക്ക രീതിയിൽ ലൈറ്റുകൾ ക്രമീകരിക്കണമെന്ന് ആവശ്യപ്പെട്ട് 25 -ാം വാർഡ് കൗൺസിലർ കെഎസ്ഇബിയെ സമീപിച്ചിരുന്നു. എന്നാൽ ഇവിടെ ലൈറ്റുകൾ സ്ഥാപിക്കാൻ റെയിൽവേയുടെ അനുമതി ലഭിക്കേണ്ടതുണ്ടെന്ന് കെഎസ്ഇബി അറിയിച്ചു.
തുടർന്ന് കൗൺസിലർ സിനിബിജു റെയിൽവേ അധികൃതർക്ക് ജനങ്ങളുടെ ബുദ്ധിമുട്ട് പരിഹരിക്കണമെന്ന് ആവശ്യപ്പെട്ട് പരാതി നൽകി. പിന്നീട് റെയിൽവേ പാസഞ്ചേഴ്സ് അമിനിറ്റി കമ്മറ്റി ചെയർമാൻ പി.കെ കൃഷ്ണദാസ് ചെങ്ങന്നൂർ റെയിൽവേ സ്റ്റേഷൻ സന്ദർശിച്ചപ്പോൾ ഈ വിവരം അദ്ദേഹത്തിന്റ് ശ്രദ്ധയില്പ്പെടുത്തുകയും ചെയ്തു. തുടർന്ന് കൂടിയ ശബരിമല അവലോകന യോഗത്തിൽ തീർത്ഥാടനവുമായി ബന്ധപ്പെട്ട് നടത്തുന്ന നിർമ്മാണ പ്രവർത്തനങ്ങളിൽ ഉൾപ്പെടുത്തി റെയിൽവേ മേൽപ്പാലത്തിന് താഴെ ലൈറ്റുകൾ സ്ഥാപിക്കാൻ തീരുമാനിക്കുയും ഇന്നലെ ലൈറ്റുകൾ സ്ഥാപിക്കുകയും ചെയ്തു.
