ഒഡീഷ : പാർക്കിങ്ങിൽ നിർത്തിയിട്ടിരുന്ന ഇലക്ട്രിക് ബൈക്കിന് തീപിടിച്ചതിനെത്തുടർന്ന് നോയിഡ സെക്ടർ 66 ലെ ഒരു കെട്ടിടത്തിൽ വൻ തീപിടിത്തം. രണ്ട് പേർ മരണപ്പെടുകയും നിരവധി പേർക്ക് പരുക്കേൽക്കുകയും ചെയ്തു. വാഹനത്തിന് തീപിടിക്കുകയും തുടർന്ന് സമീപത്ത് പാർക്ക് ചെയ്തിരുന്ന മറ്റ് വാഹനങ്ങളിലേക്ക് തീ പടരുകയുമായിരുന്നു. പുക കെട്ടിടത്തിന്റെ മുകളിലത്തെ നിലകളിലേക്ക് ഉയരുകയും മറ്റു അപ്പാർട്ടുമെന്റുകളിലേക്ക് പടരുകയും ചെയ്തു. അകത്തെ മുറികളിൽ താമസിച്ചിരുന്ന അൻപത് കുടുംബങ്ങളെ അഗ്നിശമന സേനാംഗങ്ങൾ ഒഴിപ്പിച്ച് തീ നിയന്ത്രണവിധേയമാക്കി.
“ഈ പ്രദേശത്ത് എന്തെങ്കിലും സംഭവിച്ചാൽ, ഞങ്ങളെ രക്ഷിക്കാനുള്ള വഴി എപ്പോഴും അടഞ്ഞുകിടക്കുന്നതിനാൽ ഞങ്ങൾ മരിക്കാനുള്ള സാധ്യത കൂടുതലാണ്. ഈ പ്രശ്നം കാട്ടി നിരവധി തവണ ഞങ്ങൾ ഉദ്യോഗസ്ഥരെ സമീപിച്ചു. പക്ഷേ യാതൊരു ഫലവും ഉണ്ടായില്ല. ആർക്കെങ്കിലും ഹൃദയാഘാതം വന്നാൽ, ഒരു ആംബുലൻസിന് പോലും ഇവിടേക്കെത്താൻ കഴിയില്ല,” പ്രദേശത്തെ ഒരു താമസക്കാരൻ മാധ്യമങ്ങളോട് പറഞ്ഞു.
