തിരുവനന്തപുരം : ജില്ല ഇലക്ട്രിക്കല്സ് ആന്ഡ് ഇലക്ട്രോണിക്സ് ടെക്നീഷ്യന്സ് സഹകരണസംഘത്തിന്റെ മറവില് നാലരകോടിയോളം രൂപ തട്ടിയ കേസില് സഹകരണസംഘം ഓണററി സെക്രട്ടറി ലേഖ പി നായരെയും ഭര്ത്താവ് കൃഷ്ണകുമാറിനെയും ഫോര്ട്ട് പോലീസ് അറസ്റ്റ് ചെയ്തു. അമ്പലമുക്ക് സ്വദേശി കുമാര് നല്കിയ പരാതിയുടെയും സഹകരണസംഘം അസി.രജിസ്ട്രാറുടെ റിപ്പോര്ട്ടിന്റെയും അടിസ്ഥാനത്തിലാണ് നടപടി. ഇരുവരെയും പുന്നപുരം ക്ഷേത്രഭാഗത്തുവെച്ച് പോലീസ് പിടികൂടിയത്. കേസിലെ മറ്റ് പ്രതികളും ഭരണസമിതി അംഗങ്ങളുമായ മുരുകന്, പി.പ്രീതി, അജിത്ത് സലീം, ജി.ശ്രീകുമാര്, എല്.ശ്രീപതി, ഉണ്ണികൃഷ്ണന് നായര് എന്നിവര്ക്കെതിരെ അന്വേഷണം ആരംഭിച്ചു. ഇവര് ഒളിവിലാണെന്നാണ് പൊലീസ് ഭാഷ്യം.
2013 മുതല് തകരപ്പറമ്പ് കൊച്ചാര് റോഡില് പ്രവര്ത്തിക്കുന്ന ജില്ല ഇലക്ട്രിക്കല്സ് ആന്ഡ് ഇലക്ട്രോണിക്സ് ടെക്നീഷ്യന്സ് സഹകരണ സംഘത്തിന്റെ മറവില് ഓണററി സെക്രട്ടറി ലേഖ പി നായരും ഭര്ത്താവ് കൃഷ്ണകുമാറും ചേര്ന്ന് 1,05,21,291 രൂപയും ഭരണസമിതി അംഗങ്ങളായ ആറുപേര് ചേര്ന്ന് 3,57,11,832 രൂപ തട്ടിയെന്നുമാണ് അസി.രജിസ്ട്രാര് സംസ്ഥാന സര്ക്കാറിന് നല്കിയ റിപ്പോര്ട്ട്. പ്രതിമാസ നിക്ഷേപ പദ്ധതിയില് ഗുരുതര ക്രമക്കേടുകള് നടത്തി ലേഖയും കൃഷ്ണകുമാറും ചേര്ന്ന് 80,30,00 രൂപ വെട്ടിച്ചു. സേവിങ്സ് അക്കൗണ്ടുകളില് നിന്നും നിക്ഷേപകരുടെ അറിവോ സമ്മതമോ ഇല്ലാതെ 2,24,483 രൂപ ലേഖ സ്വന്തം അക്കൗണ്ടിലേക്ക് മാറ്റി. പെന്ഷന് സമ്പാദ്യവും പെണ്മക്കളുടെ വിവാഹത്തിനായി കരുതിവെച്ച പണവും സംഘത്തില് നിക്ഷേപിച്ചവരാണ് വഞ്ചിതരായവരില് ഏറെയും.
ജാമ്യവ്യവസ്ഥകള് പാലിക്കാതെ ലേഖ പി നായര് സ്വന്തം പേരിലും ഭര്ത്താവ് കൃഷ്ണകുമാറിന്റെ പേരിലും 2,42,025രൂപയും അക്ഷയ നിധിയുടെ പേരില് 1,51,033 രൂപയും തട്ടിയതായും അന്വേഷണത്തില് കണ്ടെത്തി. സ്ഥിര നിക്ഷേപമില്ലാത്തവര്ക്ക് സ്ഥിര നിക്ഷേപ വായ്പ നല്കിയതായി രജിസ്റ്ററില് രേഖപ്പെടുത്തി രണ്ടരലക്ഷം തട്ടി. സര്ക്കാര് ചട്ടങ്ങള്ക്ക് വിരുദ്ധമായി സംഘത്തിലേക്ക് 11 താല്ക്കാലിക ജീവനക്കാരെയും 10 കലക്ഷന് ഏജന്റുമാരെയും നിയമിച്ചിരുന്നു. ഇവര്ക്ക് 19,58,310 രൂപയാണ് ശമ്പളമായി നല്കിയത്. സഹകരണവകുപ്പിന്റെ അനുമതി ലഭിക്കാതെ അനധികൃതമായി നല്കിയ ഈ ശമ്പളം 18 ശതമാനം പലിശ സഹിതം ബന്ധപ്പെട്ട ഭരണസമിതി അംഗങ്ങളില് നിന്നും ഈടാക്കണമെന്നും അസി.രജിസ്ട്രാറുടെ റിപ്പോര്ട്ടിലുണ്ടായിരുന്നു. സാമ്പത്തിക ഇടപാടുകള് സംബന്ധിച്ച് ഇരുവരെയും പോലീസ് ചോദ്യം ചെയ്തുവരുകയാണ്.
