കട്ടപ്പന : മുളകുപൊടി വിതറി ജ്വല്ലറിയുടെ പൂട്ട് അറുത്തുമാറ്റി 2,57,500 രൂപയുടെ വെള്ളി ആഭരണങ്ങള് കവര്ന്നു. പുറ്റടിയിലെ ന്യൂമരിയ ജ്വല്ലറിയുടെ പൂട്ട് അറുത്തുമാറ്റിയാണ് 2,57,500 രൂപയുടെ വെള്ളി ആഭരണങ്ങള് കവര്ന്നത്. ശനിയാഴ്ച രാത്രി നടന്ന മോഷണം പിറ്റേന്ന് ഉച്ചകഴിഞ്ഞാണ് പുറംലോകം അറിയുന്നത്. വെള്ളി ആഭരണങ്ങളും ഒരുഗ്രാം തങ്കത്തില് പൊതിഞ്ഞ ആഭരണങ്ങളുമാണ് നഷ്ടപ്പെട്ടത്. സ്വര്ണാഭരണങ്ങള് ഉടമയായ അമ്പലമേട് അഞ്ചനാട്ട് സാജന് തന്റെ വീട്ടിലേക്ക് കൊണ്ടുപോയിരുന്നതിന്നാല് നഷ്ടപ്പെട്ടില്ല. ഞായറാഴ്ച ജ്വല്ലറി അവധിയായിരുന്നതിനാല് വൈകീട്ട് മൂന്നരയോടെ ഇവിടെ വാഹനം പാര്ക്കു ചെയ്യാന് എത്തിയവരാണ് താഴ് അറുത്തിട്ടിരിക്കുന്നത് കണ്ട് ഉടമയെ അറിയിച്ചത്. തുടര്ന്ന് വണ്ടന്മേട് പോലീസ് സ്ഥലത്തെത്തി പരിശോധന നടത്തി. ജ്വല്ലറിയിലാകെ മുളകുപൊടി വിതറിയിട്ടുണ്ട്. സ്ഥാപനത്തില് നിരീക്ഷണ കാമറ ഉണ്ടായിരുന്നില്ല. പോലീസ് കേസെടുത്ത് അന്വേഷണം തുടങ്ങി.
