തിരുവനന്തപുരം: എന്ഡോസള്ഫാന് പുനരധിവാസ വില്ലേജിന്റെ ഒന്നാംഘട്ട നിര്മാണപ്രവര്ത്തനങ്ങള്ക്ക് 4.9 കോടി രൂപയുടെ ഭരണാനുമതി. കാസര്കോട് ജില്ലയിലെ എന്ഡോസള്ഫാന് ദുരിതബാധിതരുടെ പുനരധിവാസത്തിനായി കാസര്കോട് മൂളിയാല് വില്ലേജില് സ്ഥാപിക്കുന്ന എന്ഡോസള്ഫാന് പുനരധിവാസ വില്ലേജിന്റെ ഒന്നാംഘട്ട നിര്മാണ പ്രവര്ത്തനങ്ങള്ക്ക് 4.9 കോടി രൂപയുടെ ഭരണാനുമതി നല്കിയതായി ആരോഗ്യമന്ത്രി കെ.കെ. ശൈലജ അറിയിച്ചു.
എന്ഡോസള്ഫാന് ദുരിതബാധിതരുടെ ശാരീരികവും മാനസികവുമായ സമഗ്ര പുനരധിവാസം ലക്ഷ്യമാക്കിയാണ് സാമൂഹികനീതി വകുപ്പിന് കീഴില് പുനരധിവാസ വില്ലേജ് സ്ഥാപിക്കുന്നത്. നിപ്മറിന്റെ സാങ്കേതിക സഹായത്തോടെയുള്ള പദ്ധതിക്ക് 58.75 കോടിയാണ് കണക്കാക്കുന്നത്. ഒന്നാം ഘട്ടത്തില് 4.9 കോടിയുടെ നിര്മാണ പ്രവര്ത്തനങ്ങളാണ് നടക്കുന്നത്. ഇതിനാണ് ഭരണാനുമതി നല്കിയത്. എന്ഡോസള്ഫാന് പുനരധിവാസ വില്ലേജിന്റെ തറക്കല്ലിടല് മാര്ച്ച് 14ന് നടക്കും. എത്രയും വേഗം നിര്മാണപ്രവര്ത്തനങ്ങള് തുടങ്ങി പുനരധിവാസ വില്ലേജ് സാക്ഷാത്കരിക്കുമെന്നും മന്ത്രി വ്യക്തമാക്കി.
എന്ഡോസള്ഫാന് ദുരിതബാധിതമേഖലകളിലെ പ്രത്യേക സ്കൂളുകള് മാതൃകാ ശിശു പുനരധിവാസ കേന്ദ്രങ്ങളായി ഉയര്ത്തുന്നതിന്റെ ഉദ്ഘാടനവും അന്നുതന്നെ നടക്കും. ആദ്യഘട്ടത്തില് പ്രവര്ത്തനം പൂര്ത്തീകരിച്ച നാല് സ്കൂളുകളാണ് സാമൂഹിക സുരക്ഷ മിഷന് ഏറ്റെടുത്ത് മാതൃക ശിശു പുനരധിവാസകേന്ദ്രങ്ങളായി ഉയര്ത്തുന്നത്. മൂളിയാര്, കയ്യൂര് ചീമേനി, കാറടുക്ക കുമ്പടാജെ എന്നീ മാതൃക ശിശു പുനരധിവാസകേന്ദ്രങ്ങളാണ് ഉദ്ഘാടനം ചെയ്യുന്നത്.