കാസര്കോട്: ജില്ലാ ഭരണ സംവിധാനത്തിന് സംസ്ഥാന സര്ക്കാര് അനുവദിച്ച 200 കോടി രൂപയില് ജൂണ് 30 വരെ സുപ്രീം കോടതി വിധിപ്രകാരം 2972 ദുരിത ബാധിതര്ക്ക് 111.46 കോടി രൂപ നഷ്ടപരിഹാരം അനുവദിച്ചതായി ജില്ലാ കളക്ടര് ഭണ്ഡാരി സ്വാഗത് രണ്വീര് ചന്ദ് അറിയിച്ചു.
430 ദുരിത ബാധിതര് ഇനിയും അപേക്ഷ നല്കാന് ബാക്കിയുണ്ട്. ഇവര് എത്രയും വേഗം മതിയായ രേഖകള് സഹിതം അക്ഷയ കേന്ദ്രം വഴി അപേക്ഷ നല്കി ധനസഹായം കൈപ്പറ്റണം കൂടുതല് വിവരങ്ങള് വില്ലേജ് ഓഫീസില് നിന്ന് ലഭിക്കും.
ഇനിയും അപേക്ഷ നല്കിയിട്ടില്ലാത്തവര്ക്ക് പൊതുവായി വിവരം നല്കുന്നതിന് ജൂലൈ ഏഴിന് പബ്ലിക് നോട്ടീസ് നല്കും. ദുരിതബാധിതപട്ടികയില് ഉള്പ്പെട്ടവരില് ധനസഹായം ആവശ്യമില്ലാത്തവര് രേഖാമൂലം ആ വിവരം അറിയിച്ച് വില്ലേജ് ഓഫീസില് അപേക്ഷ നല്കേണ്ടതാണ്. ദുരിത ബാധിതരുടെ പട്ടികയില് ഉള്പ്പെട്ട അഞ്ചു മുതല് പത്തുശതമാനത്തോളം പേരെ ലഭ്യമായ മേല് വിലാസത്തില് കണ്ടെത്താന് കഴിഞ്ഞിട്ടില്ല. ഇവരെ കണ്ടെത്താനായി ആ ലിസ്റ്റ് ബന്ധപ്പെട്ട പഞ്ചായത്ത് ജനപ്രതിനിധികള്ക്ക് കൈമാറിയിട്ടുണ്ട്. ആശാ വര്ക്കര്മാര് ലഭ്യമായ വീട്ടുവിലാസത്തിലേക്ക് പോകുകയോ ചെയ്തിട്ടുണ്ട്. ഇവരെ കണ്ടെത്താന് താലൂക്ക് ടീമിന് വാഹനം നല്കിയെങ്കിലും ലഭ്യമായ വിലാസത്തില് കണ്ടെത്താന് സാധിച്ചിട്ടില്ല. മരിച്ചവരുടെ കേസുകളില് നിയമപരമായ അവകാശ സര്ട്ടിഫിക്കറ്റ് ലഭ്യമായിട്ടില്ലാത്തവര്ക്ക് എല്ലാ നിയമപരമായ അവകാശികളുടെയും സമ്മതം സഹിതം അപേക്ഷിച്ചാല് ധനസഹായം അനുവദിക്കുന്നതാണ്.കൂടുതല് അപേക്ഷ കെട്ടിക്കിടക്കുന്ന വില്ലേജ് ഓഫീസുകളില് താലൂക്ക് ടീമുകളെ നിയോഗിച്ചിട്ടുണ്ട്. ഡെപ്യൂട്ടി കളക്ടര്മാരെ താലൂക്ക് തലത്തില് മേല്നോട്ടം വഹിക്കുന്നതിന് ചുമതലപ്പെടുത്തിയിട്ടുണ്ടെന്നും കളക്ടര് പറഞ്ഞു.