കൊച്ചി: കേരള ലാറ്റിന് കാത്തലിക് അസോസിയേഷന് (കെഎല്സിഎ) സ്ഥാപക ജനറല് സെക്രട്ടറി ഡോ. ഇ.പി.ആന്റണി (90) അന്തരിച്ചു. എറണാകുളത്ത് ഇന്ന് രാവിലെയായിരുന്നു അന്ത്യം. സംസ്കാരം ചൊവ്വാഴ്ച രാവിലെ 11ന് ചെമ്പുമുക്ക് സെന്റ് മൈക്കിള്സ് പള്ളിയില്. കേരളത്തിലെ ലത്തീന് ബിഷപ്പുമാരുടെ അംഗീകാരത്തോടും പിന്തുണയോടും കൂടി രൂപതാ തലങ്ങളില് പ്രവര്ത്തിച്ചു വന്നിരുന്ന ലത്തീന് സമുദായ അസോസിയേഷനുകള് ഒരു ഫെഡറേഷന് എന്ന നിലയില് ഒരുമിച്ച് പ്രവര്ത്തിക്കുവാന് രൂപീകരിക്കപ്പെട്ടതാണ് കെഎല്സിഎ. ഇതിനായി മുന്കൈയെടുത്ത് പ്രവര്ത്തിച്ചവരില് ഒരാളായിരുന്നു ഇ.പി.ആന്റണി.
1972 മാര്ച്ച് 26-ന് എറണാകുളത്ത് ചേര്ന്ന ലാറ്റിന് കാത്തലിക് അസോസിയേഷനുകളുടെ പ്രതിനിധിയോഗമാണ് സംസ്ഥാനതല സംഘടനയ്ക്ക് രൂപം നല്കിയത്. ആര്ച്ച് ബിഷപ്പ് ഡോ.ജോസഫ് കേളന്തറയായിരുന്നു ഉദ്ഘാടകന്. പ്രസിഡന്റായി ഷെവലിയാര് കെ.ജെ.ബെര്ളിയെയും ജനറല് സെക്രട്ടറിയായി ഇ.പി.ആന്റണിയെയും സമ്മേളനം തെരഞ്ഞെടുക്കുകയും ചെയ്തു. 1975 മുതല് 81 വരെ പിഎസ്സി അംഗമായും പ്രവര്ത്തിച്ചു. വരാപ്പുഴ അതിരൂപത ചെമ്പുമുക്ക് സെന്റ് മൈക്കിള്സ് ഇടവകാംഗമാണ്.
