കൊച്ചി : ഉപതിരഞ്ഞെടുപ്പ് നടക്കുന്ന തൃക്കാക്കരയില് ഇടതുമുന്നണിക്ക് ലഭിച്ചിരിക്കുന്നത് മുത്ത് പോലെയുള്ള സ്ഥാനാര്ഥിയെയാണെന്ന് എല്ഡിഎഫ് കണ്വീനര് ഇ.പി.ജയരാജന്. മണ്ഡലത്തില് ഡോ. ജോ ജോസഫ് വന് ഭൂരിപക്ഷത്തില് ജയിക്കുമെന്നും അദ്ദേഹം പറഞ്ഞു. പാര്ട്ടി സ്ഥാനാര്ഥിയാണ് ജോ ജോസഫ് മത്സരിക്കുന്നത്. അരിവാള് ചുറ്റിക നക്ഷത്രം അടയാളത്തിലാകും അദ്ദേഹം മത്സരിക്കുക. സ്ഥാനാര്ഥിത്വത്തില് സഭയുടെ ഇടപെടലൊന്നും ഉണ്ടായിട്ടില്ല. ഇതൊക്കെ വെറും ആരോപണം മാത്രമാണെന്നും ജയരാജന് കൂട്ടിച്ചേര്ത്തു.
തൃക്കാക്കര ഉപതെരഞ്ഞെടുപ്പില് സ്ഥാനാര്ഥിത്വം ലഭിച്ചത് ഭാഗ്യമെന്ന് എല്ഡിഎഫ് സ്ഥാനാര്ഥി ഡോ. ജോ ജോസഫ് പറഞ്ഞു. ഇടതുപക്ഷമാണ് ഹൃദയപക്ഷമെന്നും എപ്പോഴും താനൊരു കമ്യൂണിസ്റ്റ്കാരനാണെന്നും ജോ ജോസഫ് കൂട്ടിച്ചേര്ത്തു. തന്റെ സ്ഥാനാര്ഥിത്വത്തില് സഭയ്ക്ക് പങ്കില്ലെന്നും താന് സഭയുടെ സ്ഥാനാര്ഥിയെന്നത് ആരോപണം മാത്രമാണ്. തനിക്ക് എല്ലാ സാമുദായിക സംഘടനകളുടെയും വോട്ട് വേണമെന്നും അദ്ദേഹം ആവശ്യപ്പെട്ടു.