തിരുവനന്തപുരം : മുഖ്യമന്ത്രിയുടെ സുരക്ഷയെ ശക്തമാക്കിയതിനെ ന്യായീകരിച്ച് എല്.ഡി.എഫ് കണ്വീനര് ഇ.പി ജയരാജന്. മുഖ്യമന്ത്രിക്കെതിരെ അക്രമം നടത്താന് ലക്ഷ്യമിടുന്നവര്ക്ക് പ്രോത്സാഹനം നല്കരുതെന്ന് ജയരാജന് പറഞ്ഞു. കറുത്ത മാസ്കും ഷര്ട്ടും തന്നെ ധരിക്കണമെന്ന് എന്താണിത്ര നിര്ബന്ധമെന്ന് ചോദിച്ച ജയരാജന് മാധ്യമങ്ങള് തെറ്റായ പ്രചാരണം നടത്തുകയാണെന്ന് കുറ്റപ്പെടുത്തി. മാസ്ക് പ്രതിഷേധത്തിന് ഉപകരണമാക്കുന്നുവെന്ന് മന്ത്രി എം.വി ഗോവിന്ദനും പ്രതികരിച്ചു.
ശനിയാഴ്ച മുഖ്യമന്ത്രി പങ്കെടുത്ത പരിപാടികളില് കറുത്ത മാസ്കിന് നിരോധനമുണ്ടായിരുന്നു. ഇന്ന് മുഖ്യമന്ത്രി പങ്കെടുക്കുന്ന മലപ്പുറം, കോഴിക്കോട് ജില്ലകളിലെ പരിപാടികളില് കറുത്ത മാസ്കിന് വിലക്കുണ്ടെന്നാണ് റിപ്പോര്ട്ട്. വൈകീട്ട് 5.30ന് കോഴിക്കോട് സെന്റ് ജോസഫ്സ് ദേവാലയാങ്കണത്തില് നടക്കുന്ന കോഴിക്കോട് രൂപത ശതാബ്ദി ആഘോഷ പൊതുസമ്മേളനത്തിന്റെ ഉദ്ഘാടനച്ചടങ്ങില് പങ്കെടുക്കുന്നവര് കറുത്ത മാസ്ക് ഒഴിവാക്കണമെന്ന് പോലീസ് ഉദ്യോഗസ്ഥര് ബന്ധപ്പെട്ടവരെ അറിയിച്ചിട്ടുണ്ട്.