കണ്ണൂര്: രക്തസാക്ഷികള് കണ്ടവനോട് അനാവശ്യമായി കലഹിക്കാന് പോയി വെടിയേറ്റ് മരിച്ചവര് എന്ന തലശ്ശേരി ബിഷപ്പ് ജോസഫ് പാംപ്ലാനിയുടെ പ്രസ്താവനക്കെതിരെ ഇടതുമുന്നണി കണ്വീനര് ഇ പി ജയരാജന്. ഉന്നത സ്ഥാനത് ഇരിക്കുന്ന മഹത് വ്യക്തിയാണ് ബിഷപ്പ്. അങ്ങനെ ഒരാളില് നിന്ന് ഇങ്ങനെ ഒരു പ്രസ്താവന ഉണ്ടാകും എന്ന് കരുതാന് കഴിയില്ല. ഗാന്ധിജി രക്തസാക്ഷി ആണ്. ഗാന്ധിജി പാലത്തില് നിന്ന് വീണു മരിച്ചതാണോ.രക്തസാക്ഷികളെ ആദരവോടെ കാണുന്നതാണ് നമ്മുടെ സമൂഹം. ബിഷപ് അങ്ങനെ പ്രസംഗിച്ചത് എന്തിനു വേണ്ടിയാണെന്നും ഇപി ജയരാജന് ചോദിച്ചു.
രക്തസാക്ഷികള് കണ്ടവനോട് അനാവശ്യമായി കലഹിക്കാന് പോയി വെടിയേറ്റ് മരിച്ചവര് എന്നാണ് പാംപ്ലാനിയുടെ പരാമര്ശം. ചിലര് പോലീസ് ഓടിച്ചപ്പോള് പാലത്തില് നിന്ന് തെന്നിവീണ് മരിച്ചവര് എന്നും പാംപ്ലാനി രക്തസാക്ഷികളെ അവഹേളിച്ചു കൊണ്ട് പറഞ്ഞു. കെസിവൈഎം യുവജന ദിനാഘോഷത്തിലായിരുന്നു ജോസഫ് പാംപ്ലാനിയുടെ പ്രസംഗം. ഒരു വൈദീകന് ചേരാത്ത രീതിയിലുള്ള അധിക്ഷേപ പരാമര്ശങ്ങളാണ് പ്ലാംപാനി നടത്തിയത് എന്ന വ്യാപകവിമര്ശനങ്ങളാണ് ബിഷപ്പിനെതിരെ ഉയരുന്നത്.
