തിരുവനന്തപുരം : ഇ-പോസ് യന്ത്രം തകരാറിലായതോടെ സംസ്ഥാനത്ത് റേഷൻ വിതരണം നിലച്ചു. നെറ്റ് വർക്ക് പ്രശ്നം മൂലമാണ് രാവിലെ ഒമ്പത് മുതൽ റേഷൻ വിതരണം നിലച്ചത്. ഇ-പോസ് യന്ത്രം പ്രവർത്തിച്ച റേഷൻ കടകളിൽ കാർഡ് ഉടമകളുടെ വിരലടയാളം പതിക്കാനും ഒ.ടി.പി വരാനും ഏറെനേരം കാത്തിരിക്കേണ്ടി വന്നു.
മാസാവസാനമായതിനാൽ റേഷൻ കടകളിൽ ഭക്ഷ്യകിറ്റ് അടക്കം സാധനങ്ങൾ വാങ്ങുന്നതിന് വലിയ തിരക്കാണ് അനുഭവപ്പെടുന്നത്. തകരാർ ഉടൻ പരിഹരിക്കുമെന്ന് സിവിൽ സപ്ലൈസ് വകുപ്പ് അറിയിച്ചു. ഇ-പോസ് യന്ത്രം തകരാറിലാകുന്നത് പരിഹാരമായി സെർവർ മാറ്റുന്നത് അടക്കമുള്ള നടപടികൾ സ്വീകരിക്കണമെന്ന് റേഷൻ വ്യാപാരികൾ നിരന്തരം ആവശ്യപ്പെട്ടിരുന്നു.