കോന്നി : താഴൂര് കടവ് പമ്പ് ഹൗസിന് സമീപം മായാലില് ആറ്റുതീരത്ത് നടത്തിയ എക്സൈസ് പരിശോധനയില് ചാരായം വാറ്റുന്നതിനായി തയ്യാറാക്കിയ കോട ശേഖരം കണ്ടെത്തി. ചൊവ്വാഴ്ച വൈകുന്നേരമാണ് കോന്നി എക്സൈസ് സംഘത്തിന്റെ നേതൃത്വത്തില് നടത്തിയ പരിശോധനയില് കോട ശേഖരം കണ്ടെത്തിയത്. വിവിധ കന്നാസുകളിലായി സൂക്ഷിച്ചിരുന്ന 140 ലിറ്റര് കോട സംഘം പിടിച്ചെടുത്തു. എക്സൈസിന് ലഭിച്ച രഹസ്യ വിവരത്തിന്റെ അടിസ്ഥാനത്തില് ആയിരുന്നു പരിശോധന. സൂചന ലഭിച്ചെങ്കിലും പ്രതികളെ പിടികൂടുവാന് കഴിഞ്ഞില്ലെന്നും പ്രതികള്ക്കായി അന്വേഷണം ഊര്ജിതമാക്കിയതായും അധികൃതര് പറഞ്ഞു.
നിയമസഭാ തെരഞ്ഞടുപ്പിനോട് അനുബന്ധിച്ച് ജില്ലയില് നടത്തി വന്ന സ്പെഷ്യല് എന്ഫോഴ്സ്മെന്റ് പ്രോഗ്രാമിന്റെ ഭാഗമായി കോന്നി എക്സൈസ് റെയ്ഞ്ച് ഇന്സ്പെക്ടര് റ്റി.എം ശ്രീകാന്തിന്റെ നേതൃത്വത്തിലാണ് തിരച്ചില് നടന്നത്. അസിസ്റ്റന്റ് എക്സൈസ് ഇന്സ്പെക്ടര് സി.രാജു, പ്രിവന്റിവ് ഓഫീസര്മാരായ ഡി.അജയകുമാര്, എച്ച്. മഹേഷ്, ശൈലേന്ദ്ര കുമാര്, സിവില് എക്സൈസ് ഓഫീസര് കെ.ബാബു എന്നിവര് പരിശോധനയില് പങ്കെടുത്തു.
