കോന്നി : കോന്നി എക്സൈസ് റേഞ്ച് നടത്തിയ പരിശോധനയിൽ അരുവാപ്പുലം അക്കരക്കാലാപ്പടിയിൽ നിന്ന് കോട കണ്ടെടുത്തു. സംഭവത്തിൽ അക്കരക്കാലാപ്പടി ഉഴിഞ്ഞാക്കോട്ടുമണ്ണിൽ കലേഷ് കെ(30) യുടെ പേരിൽ എക്സൈസ് അബ്കാരി കേസ് രജിസ്റ്റർ ചെയ്തു.
ബാറുകളും ബിവറേജുകളും അടച്ചിട്ട സാഹചര്യത്തിൽ ചാരായം ഉണ്ടാക്കി വിൽപ്പന നടത്തുന്നതിന്റെ ഭാഗമായാണ് ഇയാൾ കോട നിർമ്മിച്ചതെന്ന് എക്സൈസ് അറിയിച്ചു. ഇയാളുടെ വീടിന് സമീപത്ത് കന്നാസുകളിൽ സൂക്ഷിച്ചിരുന്ന 92 ലിറ്റർ കോടയാണ് എക്സൈസ് സംഘം കണ്ടെത്തിയത്. കോന്നി എക്സൈസ് റേഞ്ച് ഇൻസ്പക്ടർ ജി പ്രശാന്തിന്റെ നേതൃത്വത്തിൽ നടത്തിയ പരിശോധനയിൽ പ്രിവൻ്റീവ് ഓഫീസർ എം പ്രസാദ്, സിവിൽ എക്സൈസ് ഓഫീസർമാരായ അജയകുമാർ ഡി, ഷെഹിൻ എ,രതീഷ്, മഹേഷ് എച്ച്, സുരേഷ് കുമാർ, വനിതാ സിവിൽ എക്സൈസ് ഓഫീസർ സന്ധ്യാ നായർ, ഇൻ്റലിജൻസ് ബ്യൂറോ ഉദ്യോഗസ്ഥരായ റ്റി എസ് സുരേഷ്, ബിനുരാജ് തുടങ്ങിയവർ പങ്കെടുത്തു.
വ്യാജവാറ്റ് നടത്തുന്നവർക്കെതിരെ കർശന നടപടികൾ സ്വീകരിക്കുമെന്ന് എക്സൈസ് ഇൻസ്പ്ക്ടർ അറിയിച്ചു. വ്യാജവാറ്റ് സംബന്ധിച്ച് പൊതുജനങ്ങൾക്ക് ലഭിക്കുന്ന രഹസ്യവിവരങ്ങൾ 9400069477എന്ന നമ്പറിൽ അറിയിക്കണമെന്ന് എക്സൈസ് അറിയിച്ചു.