കാസര്കോട്: സിപിഐഎം തൃക്കരിപ്പൂര് ഏരിയാ കമ്മിറ്റി യോഗത്തില് കണ്ണൂര് ജില്ലാ കമ്മിറ്റിക്കെതിരെ അതിരൂക്ഷ വിമര്ശനം. നിലവിലെ കണ്ണൂര് ജില്ലാ കമ്മിറ്റി പിരിച്ചുവിട്ടില്ലെങ്കില് പാര്ട്ടിയുടെ അന്ത്യം കാണുമെന്നാണ് വിമര്ശനം. പയ്യന്നൂരിലെ സംഘടന വിഷയം തൃക്കരിപ്പൂരിലെ തോല്വിക്ക് പ്രധാന കാരണമായെന്നാണ് ഏരിയാ കമ്മിറ്റി യോഗത്തിലെ വിലയിരുത്തല്. സിപിഐഎം കണ്ണൂര് ജില്ലാ സെക്രട്ടറി കെ കെ രാഗേഷിനെതിരെയും യോഗത്തില് രൂക്ഷ വിമര്ശനം ഉയര്ന്നിരുന്നു. കെ കെ രാഗേഷ് നേതാക്കളുടെ പെട്ടി തൂങ്ങിവന്ന അമൂല് ബേബിയാണെന്നാണ് യോഗത്തിലെ പരാമര്ശം. സംസ്ഥാന സെക്രട്ടറി എം വി ഗോവിന്ദന് പങ്കെടുക്കുന്ന പരിപാടികള് ബഹിഷ്കരിക്കുമെന്നും അംഗങ്ങള് പറഞ്ഞു. പി ജയരാജനും കെ കെ ശൈലജയും നേതൃനിരയിലേക്ക് വരണമെന്ന ആവശ്യവും ഉയര്ന്നു. പി ജയരാജന് പങ്കെടുത്ത ഏരിയാ കമ്മിറ്റി യോഗത്തിലാണ് വിമര്ശനമുണ്ടായത്.
