അടൂര് : അടൂര് പറക്കോട് ഹൈസ്കൂള് ജംഗ്ഷന് മുതല് തീയേറ്റര് ജംഗ്ഷന് വരെ ഓടയിലെ മണ്ണും മാലിന്യങ്ങളും നീക്കം ചെയ്യാത്തത് വെള്ളക്കെട്ടിന് കാരണമാകുന്നതായി പരാതി. ഏറെ കാലങ്ങളായി ഈ ഭാഗത്ത് ഓടയുടെ ശുചീകരണ പ്രവര്ത്തനങ്ങള് നടന്നിട്ട്. അതിനാല് ചെറിയ മഴ പെയ്താല് പോലും റോഡില് വെള്ളം നിറയുന്നത് പതിവാണ്. പറക്കോട് അമൃത ബോയ്സ് സ്കൂളിന് സമീപത്തും വലിയ രീതിയില് വെള്ളക്കെട്ടുണ്ട്. നാട്ടുകാര് പരാതി പറയുമ്പോള് അടൂര് നഗരസഭയുടെ തൊഴിലാളികളെത്തി ചെറിയ ചാലുകള് വെട്ടി വെള്ളക്കെട്ടിന് താത്കാലിക പരിഹാരം കണ്ട് തിരികെ പോകും.
മഴ പെയ്യുമ്പോള് വെള്ളക്കെട്ട് പൂര്വ്വാധികം ശക്തിയായി രൂപപ്പെടുകയും ചെയ്യും. ഓടയില് കാലങ്ങളായി അടിഞ്ഞു കൂടിയ മണ്ണും മാലിന്യങ്ങളും നീക്കം ചെയ്യാതെ ഈ വിഷയത്തിന് ശാശ്വതമായ പരിഹാരം കാണാന് കഴിയില്ലെന്നാണ് നാട്ടുകാരും സമീപത്തെ വ്യാപാരികളും പറയുന്നത്. പൊതുമരാമത്ത് വകുപ്പിനും അടൂര് നഗരസഭക്കും നിരവധി പരാതികള് നാട്ടുകാര് ഇതിനോടകം നല്കി കഴിഞ്ഞു. എന്നിട്ടും യാതൊരു നടപടിയും അധികാരികളുടെ ഭാഗത്ത് നിന്നും ഉണ്ടായിട്ടില്ല. കെട്ടിക്കിടക്കുന്ന ചെളി വെള്ളത്തില് ചവിട്ടിയാണ് സ്കൂള് കുട്ടികളും നാട്ടുകാരും നടക്കുന്നത്. ഇത് ഗുരുതരമായ രോഗങ്ങള്ക്ക് കാരണമായി തീരുമെന്നും ജനങ്ങള്ക്ക് ആശങ്കയുണ്ട്.
