ചവറ : വ്യാജ പാസ്പോര്ട്ട് ഉപയോഗിച്ച് വിദേശത്തേക്ക് കടക്കാന് ശ്രമിച്ച യുവതിയെ ചവറ പോലീസ് അറസ്റ്റ് ചെയ്തു. തിരുവനന്തപുരം ആറ്റുകാല് ദേവീക്ഷേത്ര കല്യാണമണ്ഡപത്തിനു സമീപം കല്പാംകുളംവീട്ടില് വാടകയ്ക്കുതാമസിക്കുന്ന ശ്രീലത(42)യാണ് പിടിയിലായത്. ചവറയിലെ വിലാസംവെച്ച് വ്യാജ പാസ്പോര്ട്ട് സമ്പാദിച്ചതായി ജില്ലാ പോലീസ് മേധാവി ടി.നാരായണന് ലഭിച്ച രഹസ്യ വിവരത്തിന്റെ അടിസ്ഥാനത്തില് ആള്മാറാട്ടത്തിന് യുവതിയുടെ പേരില് 2021 ഓഗസ്റ്റില് ചവറ പോലീസ് കേസെടുത്തിരുന്നു.
തുടര്ന്ന് പോലീസ് പുറപ്പെടുവിച്ച ലുക്കൗട്ട് നോട്ടീസിന്റെ അടിസ്ഥാനത്തിലാണ് തിങ്കളാഴ്ച ശ്രീലത നെടുമ്പാശ്ശേരി വിമാനത്താവളത്തില്വെച്ച് കുടുങ്ങിയത്. വസന്ത ജനാര്ദനന്, വസന്താലയം, മുകന്ദപുരം, ചവറ എന്ന വ്യാജവിലാസത്തിലെടുത്ത പാസ്പോര്ട്ട് ഉപയോഗിച്ച് ഇവര് സൗദിയില് ജോലിചെയ്തു വരികയായിരുന്നു. അവധികഴിഞ്ഞ് നെടുമ്പാശ്ശേരി വിമാനത്താവളം വഴി തിരികെ സൗദിയിലേക്ക് പോകാന് ശ്രമിക്കുമ്പോഴാണ് പിടിയിലായതെന്നാണ് സംഭവത്തെക്കുറിച്ച് പോലീസ് പറയുന്നത്.
വിമാനത്താവള അധികൃതരുടെ അറിയിപ്പ് ലഭിച്ചതിനെത്തുടര്ന്ന് ചവറ സിഐ. എ.നിസാമുദീന്റെ നേതൃത്വത്തില് എസ്ഐ. നൗഫല്, എസ്.സി.പി.ഒ.മാരായ തമ്ബി, സബിത എന്നിവരടങ്ങിയ സംഘം യുവതിയെ അറസ്റ്റ് ചെയ്ത് ചവറയിലെത്തിച്ച് കോടതിയില് ഹാജരാക്കി. ഇവര് വ്യാജ പാസ്പോര്ട്ട് ഉപയോഗിച്ച് പലതവണ വിദേശത്ത് പോയിട്ടുണ്ടെന്ന് പോലീസ് പറഞ്ഞു.
