കല്പറ്റ: കടബാധ്യതയെ തുടര്ന്ന് വയനാട്ടില് യുവ കര്ഷകന് ആത്മഹത്യ ചെയ്തു. തിരുനെല്ലി പഞ്ചായത്ത് കോട്ടിയൂരിലെ കെ.വി.രാജേഷാണ് (35) ജീവനൊടുക്കിയത്. ചൊവ്വാഴ്ച രാത്രി വീട്ടില്നിന്നും ഇറങ്ങിപ്പോയ രാജേഷിനെ വീട്ടുകാരും ബന്ധുക്കളും അന്വേഷിച്ചെങ്കിലും കണ്ടെത്തിയിരുന്നില്ല.
ബുധനാഴ്ച രാവിലെ കോട്ടിയൂര് ബസ് സ്റ്റോപ്പില് രാജേഷിനെ തൂങ്ങി മരിച്ച നിലയില് കണ്ടെത്തുകയായിരുന്നു. കൃഷി ആവശ്യത്തിനായി ബാങ്കുകളില് നിന്നും അയല്കൂട്ടങ്ങളില് നിന്നും സ്വകാര്യ വ്യക്തിയില് നിന്നും വായ്പ വാങ്ങിയിരുന്നു. എന്നാല് കൃഷി നശിച്ചതോടെ ഭീമമായ തുക നഷ്ടം വന്നു. സ്വന്തം പേരിലുള്ള സ്ഥലത്തിന്റെ രേഖ പണയം വെച്ച് കേരള ബാങ്കില് നിന്നു 90,000 രൂപയും സ്വര്ണം പണയം വെച്ച് 60,000 രൂപയും വായ്പ എടുത്താണ് കൃഷി നടത്തിയത്.
കഴിഞ്ഞ വര്ഷം വാഴ കൃഷി ചെയ്തെങ്കിലും കാട്ടാനകൂട്ടം പതിവായി കൃഷി നശിപ്പിച്ചതോടെ രാജേഷിന് വന് സാമ്പത്തിക നഷ്ടമുണ്ടായി. നഷ്ടം നികത്താനായി ഈ വര്ഷം വളരെ പ്രതിക്ഷയോടെ നെല്കൃഷി ചെയ്തെങ്കിലും അതും കാട്ടാന നശിപ്പിച്ചു. ഇതോടെ വന് കടബാധ്യതയിലായ രാജേഷ് വളരെ നിരാശയിലായിരുന്നു. ഒരു ഏക്കര് വയലിലും അര ഏക്കര് കരഭൂമിയിലും കൃഷി ചെയ്ത് ലഭിക്കുന്ന വരുമാനം കൊണ്ടായിരുന്നു കുടുബം കഴിഞ്ഞിരുന്നത്. കൃഷി നാശം സംഭവിച്ചിട്ടും വനം വകുപ്പോ കൃഷി വകുപ്പോ മറ്റ് വകുപ്പുകളോ യാതൊരുവിധ ധനസഹായവും രാജേഷിനോ കുടുംബത്തിനോ നല്കിയിട്ടില്ലെന്ന് ബന്ധുക്കള് പറഞ്ഞു.
