പത്തനംതിട്ട : കർഷകരുടെ വരുമാനം വർധിപ്പിക്കുന്നതിനും കാർഷിക ഉത്പ്പന്നങ്ങൾക്ക് ന്യായവില ഉറപ്പാക്കുന്നതിനും കേന്ദ്ര-സംസ്ഥാന സർക്കാരുകൾ കൂടുതൽ ഫലപ്രദമായ ഇടപെടലുകൾ നടത്തണമെന്ന് ഐക്യ കർഷക സംഘം ദേശീയ വൈസ് പ്രസിഡന്റ് അഡ്വ.ബി.രാജശേഖരൻ ആവശ്യപ്പെട്ടു. ഐക്യ കർഷക സംഘം പത്തനംതിട്ട ജില്ലാ കമ്മിറ്റിയുടെ നേതൃത്വത്തിൽ സംഘടിപ്പിച്ച കർഷക സംഗമം ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. കൃഷിച്ചെലവ് വർധിക്കുന്ന സാഹചര്യത്തിൽ കർഷകർക്ക് ആവശ്യമായ സഹായവും സംരക്ഷണവും ഉറപ്പാക്കേണ്ടത് അനിവാര്യമാണെന്നും അദ്ദേഹം പറഞ്ഞു.
ജില്ലാ പ്രസിഡന്റ് രവി പിള്ള അധ്യക്ഷത വഹിച്ചു. യു.ടി.യു.സി ദേശീയ സെക്രട്ടറി തോമസ് ജോസഫ് മുഖ്യപ്രഭാഷണം നടത്തി. കർഷകർ നേരിടുന്ന വിവിധ പ്രശ്നങ്ങൾ ചർച്ച ചെയ്യുന്നതിനും കാർഷിക മേഖലയെ ശക്തിപ്പെടുത്തുന്നതിനുമാണ് സംഗമം സംഘടിപ്പിച്ചത്. ജില്ലയിലെ കർഷകരുടെ വിവിധ ആവശ്യങ്ങൾ ബന്ധപ്പെട്ട അധികാരികളുടെ ശ്രദ്ധയിൽപ്പെടുത്തി തുടർപ്രവർത്തനങ്ങൾ ശക്തമാക്കാനും യോഗം തീരുമാനിച്ചു. ജില്ലാ സെക്രട്ടറി ജോൺസ് യോഹന്നാൻ, പി.പി ജോൺ, പെരിങ്ങര രാധാകൃഷ്ണൻ, ഈപ്പൻ മാത്യു, ഷൈലജ പ്രദീപ്, ഷാഹിദ ഷാനവാസ്, സുനിൽ ഏലിയാസ്, ഇസ്മായിൽ, ശ്യാമള പള്ളിക്കൽ, മായ സന്തോഷ്, സലില് വയലാത്തല, റ്റി.സൗദമിനി, ഹുസൈൻ എന്നിവർ പ്രസംഗിച്ചു.
