ന്യൂഡല്ഹി: കാര്ഷിക നിയമങ്ങള് റദ്ദാക്കണമെന്നാവശ്യപ്പെട്ട് ഡല്ഹിയില് നടക്കുന്ന കര്ഷക പ്രക്ഷോഭം 50 ദിവസം പിന്നിട്ടു. രാജ്യ തലസ്ഥാനത്തെ അതിര്ത്തികള് സ്തംഭിപ്പിച്ചുകൊണ്ടുള്ള പ്രക്ഷോഭമാണ് നടക്കുന്നത്. നിയമം പിന്വലിച്ചില്ലെങ്കില് സമരം ശക്തമാക്കുമെന്ന് കര്ഷക സംഘടനകള് മുന്നറിയിപ്പ് നല്കിയിട്ടുണ്ട്. നിയമങ്ങള് പിന്വലിക്കണമെന്ന ആവശ്യവുമായി കൂടുതല് കര്ഷകര് പഞ്ചാബില്നിന്നും മറ്റും ഡല്ഹിക്കു തിരിച്ചു.
അതിനിടെ സമരം നയിക്കുന്ന സംയുക്ത കിസാന് മോര്ച്ചയുമായി ഇന്ന് കേന്ദ്രസര്ക്കാര് നിര്ണായക ചര്ച്ച നടത്തും. കര്ഷകരുമായി കേന്ദ്രം എട്ടു തവണ നടത്തിയ ചര്ച്ചയും പരാജയപ്പെട്ടിരുന്നു. ഇന്ന് ഫലപ്രദമായ ചര്ച്ച നടക്കുമെന്നു പ്രതീക്ഷിക്കുന്നതായി കൃഷിമന്ത്രി നരേന്ദ്ര സിങ് തോമര് പറഞ്ഞു. കര്ഷക നേതാക്കളുമായി തുറന്ന മനസ്സോടെ ചര്ച്ചയ്ക്കു തയ്യാറാണെന്നും അദ്ദേഹം വ്യക്തമാക്കി.
നിയമങ്ങള് നടപ്പാക്കുന്നതു സ്റ്റേ ചെയ്യാന് സുപ്രീംകോടതി ഉത്തരവിട്ടത് കേന്ദ്രത്തിന്റെ വീഴ്ചയായി കര്ഷക സംഘടനകള് ഉന്നയിച്ചേക്കും. സുപ്രീംകോടതി വിധിയുടെ അടിസ്ഥാനത്തില് നിയമങ്ങള് റദ്ദാക്കാനും ആവശ്യപ്പെടും. നിലവിലെ നിയമങ്ങള് പരിശോധിക്കാനുള്ള സമിതിക്കു മുമ്പാകെ ഹാജരാവില്ലെന്ന് കര്ഷകനേതാക്കള് വ്യക്തമാക്കിയിട്ടുണ്ട്.
