ന്യൂഡല്‍ഹി : കര്‍ഷക പ്രക്ഷോഭത്തിന് ഐക്യദാര്‍ഡ്യം പ്രഖ്യാപിച്ച്‌ കോണ്‍ഗ്രസ് വ്യാഴാഴ്ച നടത്തുന്ന രാജ്ഭവന്‍ മാര്‍ച്ചിന് രാഹുല്‍ ഗാന്ധി നേതൃത്വം നല്‍കും. കോണ്‍ഗ്രസിന്‍റെ എല്ലാ എം.പിമാരും നേതാക്കളും അണിചേരുന്ന പ്രതിഷേധ മാര്‍ച്ചില്‍ കാര്‍ഷിക നിയമങ്ങള്‍ക്കെതിരെ രണ്ടുകോടി ജനങ്ങള്‍ ഒപ്പുവെച്ച മൊമ്മോറാണ്ടം രാഷ്ട്രപതി രാംനാഥ് കോവിന്ദിന് സമര്‍പ്പിക്കും.
കേന്ദ്ര സര്‍ക്കാരിന്‍റെ മൂന്ന് വിവാദ കാര്‍ഷിക നിയമങ്ങള്‍ പിന്‍വലിക്കണമെന്നാവശ്യപ്പെടുന്ന നിവേദനത്തിലേക്ക് രാജ്യമെമ്പാടുനിന്നും ഒപ്പുകള്‍ ശേഖരിച്ചു. ഡല്‍ഹിയില്‍ കൊടുംശൈത്യത്തിലും കാര്‍ഷിക നിയമങ്ങള്‍ പിന്‍വലിക്കണമെന്ന് ആവശ്യപ്പെട്ട് 28 ദിവസമായി സമരം ചെയ്യുന്ന കര്‍ഷകര്‍ക്ക് ഐക്യദാര്‍ഢ്യം പ്രഖ്യാപിക്കുകയാണ് മാര്‍ച്ചിന്റെ ലക്ഷ്യം.
പാര്‍ലമെന്റ് കെട്ടിടത്തിന് സമീപത്തെ വിജയ് ചൗക്കില്‍നിന്ന് രാഷ്ട്രപതി ഭവനിലേക്കായിരിക്കും രാഹുല്‍ ഗാന്ധിയും മറ്റു എം.പിമാരും മാര്‍ച്ച്‌ നടത്തുക. ഒപ്പുശേഖരണത്തിനായി കോണ്‍ഗ്രസിന്‍റെ നേതൃത്വത്തില്‍ ഒപ്പുശേഖരണ കാമ്പയിനുകള്‍ ആരംഭിച്ചിരുന്നു. കാര്‍ഷിക നിയമങ്ങള്‍ കര്‍ഷകരുടെ ആവശ്യങ്ങള്‍ സംരക്ഷിക്കുന്നതിനല്ലെന്നും മോദി സര്‍ക്കാരിന്‍റെ സുഹൃത്തുക്കളായ കുത്തക മുതലാളിമാര്‍ക്ക് വേണ്ടിയാണെന്നും കോണ്‍ഗ്രസ് ആരോപിച്ചു.
