കൊച്ചി : എറണാകുളം സൗത്ത് റെയിൽവേ സ്റ്റേഷനിൽ നികുതി വെട്ടിച്ചു കടത്താൻ ശ്രമിച്ച 38.4 ലക്ഷം രൂപയുടെ സിഗരറ്റ് റെയിൽവേ സംരക്ഷണ സേന (ആർപിഎഫ്) പിടികൂടി. ഡൽഹിയിൽ നിന്നുള്ള നിസാമുദീൻ എക്സ്പ്രസിൽ എത്തിച്ച 32 പെട്ടി സിഗരറ്റുകളാണ് ഇന്നു രാവിലെ ആർപിഎഫ് പ്രത്യേക സേന പിടിച്ചെടുത്തത്. വലിയ പെട്ടികളിലാക്കി പ്ലാസ്റ്റിക് ചാക്കിലിട്ടാണ് സിഗരറ്റ് ബോക്സുകൾ കേരളത്തിൽ വിൽപനയ്ക്കായി എത്തിച്ചത്. 23 ലക്ഷം രൂപയുടെ ജിഎസ്ടി തട്ടിപ്പാണ് സംഘം ലക്ഷ്യമിട്ടത് എന്ന് സ്പെഷൽ സ്ക്വാഡിന് നേതൃത്വം നൽകുന്ന അസിസ്റ്റന്റ് കമ്മിഷണർ ടി.എസ്. ഗോപകുമാർ പറഞ്ഞു. പിടിച്ചെടുത്ത വസ്തുക്കൾ ജിഎസ്ടി ഉദ്യോഗസ്ഥർക്ക് കൈമാറിയിട്ടുണ്ട്.
കോവിഡ് വിലക്കുകൾ പിൻവലിച്ച് ട്രെയിനുകൾ കൂടുതൽ ഓടിത്തുടങ്ങിയതോടെ ഇതര സംസ്ഥാനങ്ങളിൽ നിന്ന് നികുതി വെട്ടിച്ച് സാധനങ്ങൾ കടത്തുന്ന സംഘങ്ങൾ സജീവമായിട്ടുണ്ട്. ഈ സാഹചര്യത്തിലാണ് റെയിൽവേ സംരക്ഷണ സേന പ്രത്യേക സംഘങ്ങളെ പരിശോധനയ്ക്കായി നിയോഗിച്ചിരിക്കുന്നത്. അസിസ്റ്റന്റ് കമ്മിഷണറുടെ നിർദേശത്തെ തുടർന്ന് ഇൻസ്പെക്ടർ വിനോദ് ജി. നായരുടെ നേതൃത്വത്തിൽ സബ് ഇൻസ്പെക്ടർ ജെ. വർഗീസ്, ഹെഡ് കോൺസ്റ്റബിൾമാരായ എം.എച്ച്. അനീഷ്, പി. ആർ. പ്രസാദ്, കോൺസ്റ്റബിൾ ടി.ജി. ശ്രീനിവാസ് എന്നിവരാണ് പരിശോധന നടത്തിയത്.
