ഫറോക്ക് : വൈദേശികാധിപത്യത്തിനെതിരായ സമരപോരാട്ടത്തിന്റെ കരുത്തുറ്റ സ്മാരകംകൂടിയായ ഫറോക്ക് പഴയ ഇരുമ്പുപാലം നവീകരണം പൂര്ത്തിയാക്കി നാടിന് സമര്പ്പിച്ചു. ഉത്സവാന്തരീക്ഷത്തില് ആയിരങ്ങളുടെ സാന്നിധ്യത്തില് മന്ത്രി പി എ മുഹമ്മദ് റിയാസ് പാലം ഗതാഗതത്തിനായി തുറന്നുകൊടുത്തു. പാലത്തില് സ്ഥിരമായി വെളിച്ച സംവിധാനം ഒരുക്കുമെന്നും പഴയ പാലങ്ങളുടെ സുരക്ഷ ഉറപ്പാക്കുന്നതിനൊപ്പം ഉപയോഗിക്കാത്ത പാലങ്ങള് ടൂറിസത്തിനായി പ്രയോജനപ്പെടുത്തുമെന്നും മന്ത്രി പി എ മുഹമ്മദ് റിയാസ് പറഞ്ഞു.
മന്ത്രിയെയും മുഖ്യാതിഥി നടന് കലാഭവന് ഷാജോണിനെയും ഫറോക്ക് ടൗണില്നിന്നും ഘോഷയാത്രയായാണ് ആനയിച്ചത്. നഗരസഭാധ്യക്ഷന് എന് സി അബ്ദുറസാഖ് അധ്യക്ഷനായി. എക്സി. എന്ജിനിയര് ബെന്നി ജോണ് റിപ്പോര്ട്ട് അവതരിപ്പിച്ചു. കോര്പ്പറേഷന് സ്ഥിരംസമിതി അധ്യക്ഷന് പി സി രാജന്, കെ ടി എ മജീദ്, എം ഗിരീഷ്, ടി രാധാഗോപി, ടി കെ എ ഗഫൂര്, കെ കെ ആലിക്കുട്ടി, വി മോഹനന്, മുരളി മുണ്ടെങ്ങാട്ട്, ബഷീര് കുണ്ടായിത്തോട്, എം എം മുസ്തഫ, ബഷീര് പാണ്ടികശാല തുടങ്ങിയവര് സംസാരിച്ചു. പി കെ മിനി സ്വാഗതവും എന് വി ഷിനി നന്ദിയും പറഞ്ഞു.
