പൂന്തുറ : ഓപ്പറേഷൻ തൂഫാന്റെ ഭാഗമായി ബീമാപള്ളി ഭാഗത്തെ കടകളിൽ നടത്തിയ പരിശോധനയിൽ രണ്ടു കടകളിൽനിന്നായി രണ്ടുലക്ഷംരൂപ വിലവരുന്ന നിരോധിത പുകയില ഉത്പന്നങ്ങൾ പിടികൂടി. രണ്ടുപേരെ പൂന്തുറ പോലീസ് അറസ്റ്റുചെയ്തു. ബീമാപള്ളി സ്വദേശി മാഹീൻകണ്ണ്(42), ബീമാപള്ളി മിൽക്ക് കോളനി സ്വദേശി നസീർ(51) എന്നിവരെയാണ് അറസ്റ്റുചെയ്തത്. ഈ മാസം മൂന്നിന് ബീമാപള്ളി ഭാഗത്തെ കടകളോട് ചേർന്നുള്ള ഭൂഗർഭ അറയിൽ ഒളിപ്പിച്ചിരുന്ന 45 ലക്ഷം രൂപയുടെ നിരോധിത പുകയില ഉത്പന്നങ്ങൾ പിടികൂടിയിരുന്നു.
ഈ കേസിലെ പ്രതികൾ നൽകിയ സൂചനയിൽനിന്നാണ് ഇവരേയും പിടികൂടിയത്. ബെംഗളൂരുവിൽനിന്നെത്തിച്ചാണ് ഇവർ രഹസ്യമായി കച്ചവടം നടത്തുന്നതെന്ന് പോലീസ് പറഞ്ഞു. എസ്.ഐ.മാരായ ശ്രീജേഷ്, നിതിൻ എന്നിവരുൾപ്പെട്ട സംഘമാണ് ഇവരെ പിടികൂടിയത്. ഇവർക്കെതിരേ പൂന്തുറ പോലീസ് കേസെടുത്തു.
