കൊച്ചി: സിനിമയിലെ വയലന്സ് രംഗങ്ങള് മങ്ങിയ രീതിയില് കാണിക്കുന്നതിനും സെന്സര് ബോര്ഡ് വിലക്ക് ഏര്പ്പെടുത്തിയതായി മുന്നറിയിപ്പ് നല്കി ഡയറക്ടര് യൂണിയന് അംഗങ്ങള്ക്ക് ഫെഫ്ക കത്ത് നല്കി. സിനിമയിലെ വയലന്സ് രംഗങ്ങള് ചിത്രീകരിക്കുമ്പോള് മങ്ങിയ രീതിയിലാണ് കാണിക്കുന്നത്. ഇതിനുള്ള അനുവാദവും ഇപ്പോള് സെന്സര് ബോര്ഡ് എടുത്തുകളഞ്ഞതായാണ് ഫെഫ്ക മുന്നറിയിപ്പ് നല്കുന്നത്.
ഒട്ടനവധി സിനിമകള് ഇപ്പോള് എഡിറ്റിംഗിലും മറ്റു സാങ്കേതിക ജോലികളുടെ ഇടയിലാണ്. ഏതെങ്കിലും സിനിമകളില് വയലന്സ് രംഗങ്ങള് ഉണ്ടെങ്കില് അതൊഴിവാക്കി സെന്സറിംഗിനു എത്തിക്കാനാണ് ഫെഫ്ക ഡയറക്ടേഴ്സ് യൂണിയന് അംഗങ്ങളോട് ഫെഫ്ക ആവശ്യപ്പെടുന്നത്. സൗന്ദര്യാത്മകമായും സാങ്കേതികമായും നമ്മള് പരക്കെ ഉപയോഗിച്ച് വരുന്ന ബ്ലര് ചെയ്ത് (മങ്ങിയ രീതിയില്) കാണിക്കുക എന്ന സിനിമയുടെ എഡിറ്റിംഗ് ഭാഷാ പ്രയോഗത്തെ പൂര്ണമായും തള്ളിക്കളയുന്ന ഒരു തീരുമാനം മുന്കൂട്ടി ഉത്തരവ് നല്കാതെ സെന്സര് ബോര്ഡ് നടപ്പാക്കിയിരിക്കുകയാണ്. വയലന്സ് രംഗങ്ങള്, മദ്യപാനരംഗങ്ങള് തുടങ്ങിയവയുടെ തീവ്രത നേരിട്ട് കാണിക്കാതിരിക്കാനാണ് ഈ രംഗങ്ങള് ബ്ലര് ചെയ്ത് കാണിക്കുന്നത്. ഈ രീതി സെന്സര് ബോര്ഡ് അംഗീകരിക്കുന്നില്ല.
