തിരുവനന്തപുരം: നാളെ മുതല് നിരോധിച്ച പ്ലാസ്റ്റിക് വസ്തുക്കള് നിര്മ്മിക്കുകയോ വില്ക്കുകയോ ചെയ്താല് പിഴ നല്കണം. ബോധവല്ക്കരണത്തിന്റെ ഭാഗമായി പ്ലാസ്റ്റിക് ഉപയോഗിക്കുന്നതില് പിഴ ഈടാക്കുന്നതിന് 15 ദിവസം നല്കിയ ഇളവ് ഇന്ന് അര്ധരാത്രിയോടെ അവസാനിക്കും. പിഴ ഈടാക്കല് തുടങ്ങുമ്പോഴും ബദല് സംവിധാനങ്ങള് സംബന്ധിച്ച അവ്യക്തത തുടരുകയാണ്.
ജനുവരി ഒന്നിനാണ് പ്ലാസ്റ്റിക് നിരോധം സംസ്ഥാനത്ത് നടപ്പിലാക്കിയത്. എന്നാല് ബദല് സംവിധാനങ്ങളുടെ കുറവും ബോധവത്കരണത്തിനും കൂടി വേണ്ടിയാണ് ആദ്യത്തെ 15 ദിവസം ഇക്കാര്യത്തില് ഇളവ് വരുത്തിയത്. ഈ കാലയളവ് വരെ പിഴ ഈടാക്കേണ്ടെന്നായിരുന്നു സര്ക്കാര് തീരുമാനം. ഈ സമയപരിധി ആണ് ഇന്ന് രാത്രി 12 മണിയോടുകൂടി അവസാനിക്കുന്നത്. നാളെ മുതല് നിരോധിച്ച പ്ലാസ്റ്റിക്കുകള് ഉപയോഗിക്കുകയോ വില്ക്കുകയോ ചെയ്യാന് പാടുള്ളതല്ല. അങ്ങനെ ശ്രദ്ധയില്പ്പെട്ടാല് ആദ്യഘട്ടത്തിലെ നിയമലംഘനത്തിന് 10000 രൂപയും രണ്ടാംഘട്ടത്തിലേതിന് 25000 രൂപയും പിഴയും മൂന്നാമതും നിയമലംഘനം നടത്തുകയാണെങ്കില് 50000 രൂപയായിരിക്കും പിഴ നല്കേണ്ടി വരിക.
വീണ്ടും നിയമലംഘനം ശ്രദ്ധയില് പെട്ടാല് ഏത് സ്ഥാപനമാണോ നിയമം ലംഘിക്കുന്നത് ആ സ്ഥാപനത്തിന്റെ പ്രവര്ത്തനാനുമതി റദ്ദാക്കും. നിലവില് കലക്ടര്മാര്, സബ്ഡിവിഷണല് മജിസ്ട്രേറ്റുമാര്, തദ്ദേസസ്ഥാപനങ്ങളിലെ സെക്രട്ടറിമാര് എന്നിവര്ക്കാണ് പിഴ ഈടാക്കാനുള്ള അധികാരം നല്കിയിട്ടുള്ളത്.
ബ്രാന്ഡഡ് ഉല്പന്നങ്ങളുടെ പായ്ക്കറ്റുകളെയെല്ലാം പ്ലാസ്റ്റിക് നിരോധനത്തില് നിന്ന് സംസ്ഥാന സര്ക്കാര് ഒഴിവാക്കി. പകരം ഇവയുടെ ഉല്പാദകരും വില്പനക്കാരും ഇറക്കുമതിക്കാരും ബ്രാന്ഡഡ് ഉല്പന്ന പാക്കറ്റുകള് ഉപഭോക്താക്കളില് നിന്നു തിരികെ ശേഖരിക്കാനുള്ള പദ്ധതി തയാറാക്കി മലിനീകരണ നിയന്ത്രണ ബോര്ഡിനു സമര്പ്പിക്കുകയും പാലിക്കുകയും വേണം.
മുറിച്ചുവെച്ച ഇറച്ചിയും മീനും സൂക്ഷിക്കാന് പ്ലാസ്റ്റിക് കവറുകള് തുടര്ന്നും ഉപയോഗിക്കാം. ഈ രംഗത്തെ സംഘടനകളുടെ ആവശ്യം കണക്കിലെടുത്താണ് ഭേദഗതി. ബിവറേജസ് കോര്പ്പറേഷന്, കേരഫെഡ്, മില്മ, ജലഅതോറിറ്റി തുടങ്ങിയ പ്ലാസ്റ്റിക് പാക്കേജിങ് നടത്തുന്ന പൊതുമേഖലാ സ്ഥാപനങ്ങള് ഉപയോഗശേഷമുള്ള പ്ലാസ്റ്റിക് ശേഖരിച്ച് നീക്കം ചെയ്യണം.
എന്നാല് ചില്ലറ വില്പന ശാലകളും വഴിയോര കച്ചവടക്കാരും പഴങ്ങളും പച്ചക്കറികളും പ്ലാസ്റ്റിക് കവറില് പൊതിഞ്ഞു വില്ക്കുന്നതിനു നിരോധനമുണ്ട്. അര ലീറ്ററില് താഴെയുള്ള പെറ്റ് ബോട്ടിലുകള് നിരോധിച്ചതും ഒഴിവാക്കി. എന്നാല് അര ലീറ്ററില് താഴെയുള്ള കുടിവെള്ള കുപ്പികള് പാടില്ല. എല്ലാ വലിപ്പത്തിലുമുള്ള ബ്രാന്ഡഡ് ജ്യൂസ് ബോട്ടിലുകളും ജ്യൂസ് പായ്ക്കറ്റുകളും അര ലീറ്ററും അതിനു മുകളിലുള്ളതുമായ കുപ്പിവെള്ള ബോട്ടിലുകളും വില്ക്കാം. എന്നാല് ഇവ തിരികെ ശേഖരിക്കണം.
നിരോധിച്ച പ്ലാസ്റ്റിക് ഷീറ്റുകളുടെ പട്ടികയില് നിന്ന് ക്ലിങ് ഫിലിമിനെ ഒഴിവാക്കി. ഭക്ഷണവും പഴങ്ങളും പച്ചക്കറിയും മറ്റും പൊതിയാന് ഉപയോഗിക്കുന്ന നേര്ത്ത സുതാര്യമായ ഷീറ്റാണ് ക്ലിങ് ഫിലിം. നിരോധിച്ച പ്ലാസ്റ്റിക് കപ്പ്, പ്ലേറ്റ് തുടങ്ങിയവയുടെ പട്ടികയില് പ്ലാസ്റ്റിക് ടംബ്ലര് എന്നു കൂടി ചേര്ത്തു. പ്ലാസ്റ്റിക് കുപ്പിയിലും കവറുകളിലും ഉല്പന്നങ്ങള് വില്ക്കുന്ന ബവ്റിജസ് കോര്പറേഷന്, കേരഫെഡ്, മില്മ, ജല അതോറിറ്റി, മറ്റു പൊതുമേഖലാ സ്ഥാപനങ്ങള് എന്നിവരും പ്ലാസ്റ്റിക് തിരികെ ശേഖരിക്കണം.
