തൃശൂര്: തൃശൂര് റെയില്വെ സ്റ്റേഷൻ പാർക്കിങ് മേഖലയിലെ തീപിടിത്തത്തില് പോലീസും റെയില്വെയും രണ്ടുതട്ടില്. വൈദ്യുതി ലൈനില് നിന്ന് തീപ്പൊരി വീണാണ് ബൈക്ക് പാര്ക്കിങിൽ തീപിടിത്തമുണ്ടായത് എന്നാണ് പോലീസിന്റെ നിഗമനം. എന്നാല് വൈദ്യുതി ലൈനിന്റെ പരിസരത്തല്ല തീപിടിത്തം ഉണ്ടായതെന്നും സംഭവത്തില് ദുരൂഹത സംശയിക്കുന്നു എന്നുമാണ് റെയില്വെ പറയുന്നത്. സിസിടിവി ദൃശ്യങ്ങള് വീണ്ടെടുക്കാനുളള ശ്രമത്തിലാണ് പോലീസ്. പോലീസും റെയില്വെയും സ്ഥലത്ത് വിശദമായ പരിശോധന നടത്തിയിരുന്നു. വൈദ്യുതി ലൈനിൽ നിന്ന് തീപ്പൊരി വീണാണ് അപകടമുണ്ടായത് എന്നാണ് പോലീസിന്റെ നിഗമനം.
പാര്ക്കിങ് ഏരിയയുടെ മേല്ക്കൂരയിലെ വിടവിലൂടെ വൈദ്യുതി ലൈനില് നിന്ന് തീപ്പൊഴി വീഴുകയും അത് ഒരു ബൈക്കിന്റെ പെട്രോള് ടാങ്കില് വീഴുകയും ആ ബൈക്കില് നിന്ന് മറ്റ് ബൈക്കുകളിലേക്ക് തീ പടരുകയുമായിരുന്നു എന്നാണ് പോലീസിന്റെ പ്രാഥമിക നിഗമനം. ജീവനക്കാരുടെ മൊഴിയുള്പ്പെടെ എടുത്ത ശേഷമാണ് പോലീസിന്റെ നിഗമനം.
