കോഴിക്കോട് : വടകര ലോകനാര്കാവില് പ്രവര്ത്തിക്കുന്ന സിവില് സപ്ലൈസ് കോര്പ്പറേഷന്റെ ഗോഡൗണില് വന് തീപിടുത്തം. ഗോഡൗണില് സൂക്ഷിച്ച ഭക്ഷ്യ സാധനങ്ങള് കത്തിനശിച്ചു. ഇന്ന് പുലര്ച്ചെ അഞ്ചേ മുക്കാലോടെയാണ് സംഭവം. വടകര താലൂക്കിലെ നാല്പ്പതോളം മാവേലി സ്റ്റോറുകളിലേക്ക് വിതരണം ചെയ്യുന്ന സ്റ്റേഷനറി ഇനങ്ങള് സൂക്ഷിക്കുന്ന ഗോഡൗണിലാണ് തീപിടിച്ചത്. ലക്ഷങ്ങളുടെ നഷ്ടം കണക്കാക്കുന്നു.
ഗോഡൗണിന് സമീപം താമസിക്കുന്നവരാണ് തീപടരുന്നത് കണ്ടത്. അസിസ്റ്റന്റ് സ്റ്റേഷന് ഓഫീസര് കെ മനോജ് കുമാറിന്റെ നേതൃത്വത്തില് വടകര ഫയര് സ്റ്റേഷനിലെ രണ്ട് യൂണിറ്റും സ്റ്റേഷന് ഓഫീസര് ബാസിതിന്റെ നേതൃത്വത്തില് നാദാപുരത്ത് നിന്നുള്ള ഒരു യൂണിറ്റും തീ അണക്കാൻ രംഗത്തെത്തി. രണ്ടു മണിക്കൂറെടുത്താണ് തീ നിയന്ത്രണ വിധേയമാക്കിയത്. ഷോര്ട്ട് സര്ക്യൂട്ടാണ് അപകട കാരണമെന്നാണ് പ്രാഥമിക നിഗമനം.
