കോന്നി : ചുറ്റുമതിൽ ഇല്ലാത്ത കിണറ്റിൽ വീണ വയോധികക്ക് കോന്നി ഫയർ ഫോഴ്സ് അംഗങ്ങൾ രക്ഷകരായി. കഴിഞ്ഞ ദിവസം രാവിലെ 11.30 ഓടെയാണ് അരുവാപ്പുലം ഗ്രാമപഞ്ചായത്തിലെ ഐരവണ്ണിൽ വയോധിക കിണറ്റിൽ വീണതായി കോന്നി ഫയർ ഫോഴ്സ് ഓഫീസിൽ ഫോൺ സന്ദേശം ലഭിച്ചത്. ഐരവൺ സൊസൈറ്റി പടിക്കു സമീപം താമസിക്കുന്ന താമരശേരിൽ വീട്ടിൽ ഗൗരിയമ്മ (98) ആണ് കിണറ്റിലേക്ക് വീണത്. മുപ്പത്തിയഞ്ചടി താഴ്ചയുള്ള കിണറ്റിലേക്ക് വീണ വയോധികയെ കോന്നി ഫയർ ഫോഴ്സ് അംഗങ്ങൾ സ്ഥലത്തെത്തി രക്ഷപ്പെടുത്തുകയായിരുന്നു
കിണറ്റിൽ വെള്ളമുള്ളതിനാൽ ഇവര്‍ വെള്ളത്തിൽ ആയിരുന്നു വീണത്. ഇതിനാൽ വലിയ പരുക്കുകൾ കൂടാതെ രക്ഷപെടുകയായിരുന്നു എന്ന്ഫയർ ഫോഴ്സ് അധികൃതർ പറഞ്ഞു. ഇവരെ ആശുപത്രിയിൽ എത്തിച്ചു ചികിത്സ നൽകി. സീനിയർ ഫയർ ഓഫീസർമാരായ ഷാജുദീൻ, അജികുമാർ, സജീവ്ഖാൻ, എ പി ദില്ലു, വിവേക്, അനൂപ്‌ ഘോഷ് തുടങ്ങിയവർ രക്ഷാ പ്രവർത്തനങ്ങൾക്ക് നേതൃത്വം നൽകി.
