കായംകുളം : രാമപുരത്ത് വീട് കത്തിനശിച്ചു. തെക്കേടത്ത് സദാശിവന്റെ വീടാണ് തിങ്കളാഴ്ച പുലര്‍ച്ച കത്തിയമര്‍ന്നത്. പാചകവാതക സിലിണ്ടര്‍ പൊട്ടിത്തെറിച്ചതാണ് ഉഗ്രശബ്ദത്തിന് കാരണമായത്. ഈ സമയം വീട്ടുകാര്‍ ഇല്ലാതിരുന്നതിനാല്‍ വന്‍ ദുരന്തം ഒഴിവായി. ആഘാതത്തില്‍ സമീപത്തെ വീട്ടിലെ ജനല്‍ പാളികള്‍ ഇളകി വീണു. അഗ്നി രക്ഷാസംഘം എത്തിയപ്പോഴേക്കും തീ ആളിപ്പടര്‍ന്നിരുന്നു. ഏറെ പ്രയാസപ്പെട്ടാണ് നിയന്ത്രണവിധേയമാക്കിയത്. വൈദ്യുതി ഷോര്‍ട്ട്സര്‍ക്യൂട്ടാകാം കാരണമെന്ന് കരുതുന്നു.
പ്രദേശത്തേക്കുള്ള വൈദ്യുതി യഥാസമയം വിഛേദിക്കാനായത് രക്ഷാപ്രവര്‍ത്തനത്തിന് സഹായകമായി. സമീപത്തെ പള്ളിയില്‍ പ്രഭാത നമസ്കാരത്തിന് എത്തിയവരാണ് തീ കത്തുന്നത് ശ്രദ്ധിച്ചത്. ഷീറ്റ് മേഞ്ഞ വീടും വീട്ടുപകരണങ്ങളും പൂര്‍ണമായും നശിച്ചു.
