പത്തനംതിട്ട: പത്തനംതിട്ടയില് ആദ്യ ഷിഗെല്ല രോഗബാധ സ്ഥിരീകരിച്ചു. ആറന്മുള എഴിക്കാട് ഉന്നതിയിലെ 10 വയസുള്ള പെണ്കുട്ടിക്കാണ് രോഗം സ്ഥിരീകരിച്ചത്. കുട്ടി കോഴഞ്ചേരി ജില്ലാ ആശുപത്രിയില് ചികിത്സയിലാണ്. കഴിഞ്ഞ ദിവസമാണ് ഷിഗെല്ല രോഗബാധയുടെ ലക്ഷണങ്ങളോടെ കുട്ടിയെ കോഴഞ്ചേരി ജില്ലാ ആശുപത്രിയില് പ്രവേശിപ്പിച്ചത്. തുടര്ന്ന് നടന്ന പരിശോധനയില് കുട്ടിക്ക് രോഗം സ്ഥിരീകരിക്കുകയായിരുന്നു. കുട്ടിയുടെ ആരോഗ്യ നില തൃപ്തികരമാണെന്ന് ആരോഗ്യ വിഭാഗം അറിയിച്ചിട്ടുണ്ട്.
ജില്ലയില് ഷിഗെല്ല സ്ഥിരീകരിച്ച സാഹചര്യത്തില് പത്തനംതിട്ട ജില്ലയില് ആരോഗ്യ വകുപ്പ് അധികൃതര് പ്രതിരോധ പ്രവര്ത്തനങ്ങള് ഊര്ജിതമാക്കുകയും ജാഗ്രതാ നിര്ദ്ദേശം പുറപ്പെടുവിക്കുകയും ചെയ്തിട്ടുണ്ട്. സംസ്ഥാനത്ത് ഷിഗെല്ല ബാധിതരുടെ എണ്ണം ഉയരുകയാണ്. ഇന്നലെ മാത്രം 6 പേര്ക്കാണ് പുതിയതായി രോഗം സ്ഥിരീകരിച്ചത്. കോഴിക്കോട് ജില്ലയില് നാല് പേര്ക്കും പാലക്കാട്, പത്തനംതിട്ട ജില്ലകളില് ഓരോരുത്തര്ക്കുമാണ് രോഗബാധ കണ്ടെത്തിയത്. ജൂണ് മാസത്തില് മാത്രം സംസ്ഥാനത്ത് 200 ല് അധികം ഷിഗെല്ല കേസുകളാണ് സ്ഥിരീകരിച്ചത്. രോഗ ബാധയെ തുടര്ന്ന് സംസ്ഥാനത്ത് ആറുമരണങ്ങളും നടന്നിട്ടുണ്ട്.
