കുറ്റിപ്പുറം : വീടുകളില് വില്പ്പന നടത്തിയ മീന് തിന്ന പൂച്ചകള് തല്ക്ഷണം ചത്തു. കുറ്റിപ്പുറം നാഗപറമ്പില് ആണ് സംഭവം. പൂച്ചകള് ചത്തതോടെ നാട്ടുകാര് പരിഭ്രാന്തിയിലായി. മാണിയങ്കാടുള്ള വില്പനക്കാരന് വീടുകളില് മത്സ്യം വില്ക്കുകയായിരുന്നു. ഇയാളില് നിന്നും മീന് വാങ്ങിയ ഒരു സ്ത്രീ അടുത്ത് നിന്നിരുന്ന രണ്ട് പൂച്ചകള്ക്ക് ചെറിയ കഷ്ണം മീന് ഇട്ട് നല്കുകയായിരുന്നു. എന്നാല് ഇത് കഴിച്ച രണ്ട് പൂച്ചകളും ഉടന് ചത്തുവീണു.
സംഭവത്തെ തുടര്ന്ന് നാട്ടുകാര് മീന് വില്പന തടയുകയും നേരത്തേ ഇയാളില് നിന്ന് മീന് വാങ്ങിയ വീടുകളില് എത്തി വിവരമറിയിക്കുകയും ചെയ്തു. ആരും മീന് ഇതിനോടകം ഭക്ഷിച്ചിരുന്നില്ല. കുറ്റിപ്പുറത്തെ ഫുഡ് സേഫ്റ്റി ഓഫീസില് പരിശോധനയ്ക്ക് എത്തിക്കുകയായിരുന്നു. ശേഷം മീന് മലപ്പുറം മൊബൈല് ഫുഡ് ടെസ്റ്റിങ് ലാബില് പരിശോധന നടത്തിയെങ്കിലും അസ്വാഭാവികമായി ഒന്നും കണ്ടെത്താനായില്ല. ഫലം നെഗറ്റീവ് ആയിരുന്നു. കൂടുതല് പരിശോധനയ്ക്കായി കോഴിക്കോട്ടേക്ക് അയയ്ക്കും. മത്സ്യം എത്തിച്ച തിരൂര് മാര്ക്കറ്റിലും പരിശോധന നടത്തുമെന്ന് അധികൃതര് അറിയിച്ചു.
