അമ്പലപ്പുഴ: കാലില് റോപ്പ് കുരുങ്ങിയതിനെ തുടര്ന്ന് കടലില് വീണ മത്സ്യത്തൊഴിലാളി മരിച്ചു. അമ്പലപ്പുഴ തെക്ക് പഞ്ചായത്ത് പുതുവല്വീട്ടില് സന്തോഷ് ആണ് മരിച്ചത്. അമ്പലപ്പുഴ കച്ചേരി മുക്കിന് സമീപം വൈകീട്ടായിരുന്നു അപകടം. മത്സ്യബന്ധനത്തിനിടെ ഉണ്ടായ ശക്തമായ കാറ്റിനെ തുടര്ന്ന് വള്ളം തീരത്തടുപ്പിക്കാന് ശ്രമിക്കുമ്പോഴാണ് അപകടം. റോപ്പുമായി ബന്ധിപ്പിച്ച ആങ്കര് വള്ളത്തില് നിന്ന് സഹപ്രവര്ത്തകര്ക്ക് എറിഞ്ഞു കൊടുക്കുന്നതിനിടെ സന്തോഷിന്റെ കാലില് കുരുങ്ങി കടലില് വീഴുകയായിരുന്നു. മത്സ്യ തൊഴിലാളികളും തോട്ടപ്പള്ളി കോസ്റ്റല് പോലീസും മണിക്കൂറുകള് നീണ്ട തിരച്ചിലിനിടെ സന്തോഷിനെ കണ്ടെത്തി. വണ്ടാനം മെഡിക്കല് കോളേജ് ആശുപത്രിയിലേക്ക് കൊണ്ടുപോകുന്നതിനിടെയാണ് മരണം. മൃതദേഹം മോര്ച്ചറിയിലേക്ക് മാറ്റി.
