കോഴിക്കോട്: കനത്ത മഴയില് കോഴിക്കോട് രണ്ടുമരണം. എടച്ചേരി ആലിശേരി സ്വദേശി അഭിലാഷ് (40), ചെറുവണ്ണൂരില് വിദ്യാര്ഥിയായ മുഹമ്മദ് മിര്ഷാദ് (13) എന്നിവരാണ് മരിച്ചത്. മിര്ഷാദ് മദ്രസ വിട്ട് സൈക്കിളില് പോകുമ്പോള് വലിയപറമ്പ് കുളത്തില് തെന്നിവീഴുകയായിരുന്നു. നാട്ടുകാര് ചേര്ന്ന് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. എടച്ചേരി ആലിശേരിയില് പായല് നിറഞ്ഞ കുളത്തില് വീണാണ് അഭിലാഷ് മരിച്ചത്.
പായലും ചെളിയും നിറഞ്ഞ കുളത്തില് അഭിലാഷിനെ കാണാതാവുകയായിരുന്നു. എടച്ചേരി പോലീസ് സ്റ്റേഷനില് നിന്നും ലഭിച്ച വിവരത്തെ തുടര്ന്ന് നാദാപുരം അഗ്നിരക്ഷ നിലയത്തിലെ അസിസ്റ്റന്റ് സ്റ്റേഷന് ഓഫീസര്മാരായ സുജേഷ് കുമാര് ഷമേജ് കുമാര് ടി വിനോദന് എന്നിവരുടെ നേതൃത്വത്തില് നാദാപുരം പേരാമ്പ്ര സ്ക്യൂബ ടീം നടത്തിയ തിരച്ചിലിനൊടുവില് മൃതദേഹം കണ്ടെത്തുകയായിരുന്നു. സ്ക്യൂബ ടീമംഗങ്ങളായ സുകേഷ് കെ ബി, സത്യനാഥ് പി ആര് എന്നിവര് ചേര്ന്നാണ് മൃതദേഹം കണ്ടെത്തിയത്.
