കൊച്ചി: സിപിഎം ലോക്കല് കമ്മിറ്റി അംഗം ഉള്പ്പെട്ട പ്രളയ ദുരിതാശ്വാസ ഫണ്ട് തട്ടിപ്പ് കേസില് എന്ഫോഴ്സ്മെന്റ് ഡയറക്ടറേറ്റിന് പരാതി. കളമശ്ശേരി സ്വദേശി ഗിരീഷ് ബാബു ആണ് പരാതി നല്കിയിരിക്കുന്നത് . സംഭവത്തില് അന്വേഷണം നടത്തണമെന്നാവശ്യപ്പെട്ട് ഗിരീഷ് ബാബു നേരത്തെ വിജിലന്സിനെയും മുഖ്യമന്ത്രിയെയും സമീപിച്ചിരുന്നു. കേസില് പ്രതി സ്ഥാനത്തുള്ള ജില്ലാ കളക്ട്രേറ്റിലെ ക്ലര്ക്ക് വിഷ്ണുപ്രസാദ് അടക്കമുള്ളവരുടെ സ്വത്ത് കണ്ടുകെട്ടണം എന്നും അഴിമതി നിരോധന നിയമപ്രകാരം നടപടി സ്വീകരിക്കണമെന്നും പരാതിയില് ആവശ്യപ്പെടുന്നു
ക്രമക്കേടുമായി ബന്ധപ്പെട്ട് തൃക്കാക്കര പോലീസ് സ്റ്റേഷനില് എഫ്ഐആര് രജിസ്റ്റര് ചെയ്ത് അന്വേഷണം നടക്കുന്നുണ്ട്. ദുരിതാശ്വാസ വകുപ്പിലെ ക്ലര്ക്ക് വിഷ്ണുദാസിനെ പ്രതിയാക്കിക്കൊണ്ടാണ് പോലീസ് എഫ് ഐ ആര് രജിസ്റ്റര് ചെയ്തിരിക്കുന്നത്. വഞ്ചന, ഫണ്ട് ദുര്വിനിയോഗം, ഗുഢാലോചന, അഴിമതി എന്നീ വകുപ്പുകളാണ് ഇയാള്ക്കെതിരെ ചുമത്തിയിരിക്കുന്നത് . 10.54 ലക്ഷം രൂപ പ്രളയ ദുരിതാശ്വാസ ഫണ്ടില് നിന്ന് തട്ടിയെടുത്തെന്നാണ് കേസ്. തട്ടിപ്പ് നടത്തിയെന്ന കണ്ടെത്തലിനെ തുടര്ന്ന് ദുരിതാശ്വാസ സെല്ലിന്റെ ചുമതല വഹിച്ചിരുന്ന ക്ലാര്ക്ക് വിഷ്ണു പ്രസാദിനെ സസ്പെന്റ് ചെയ്തിരുന്നു.
എറണാകുളം കാക്കനാട് നിലംപതിഞ്ഞ മുകളില് താമസിക്കുന്ന സിപിഎം തൃക്കാക്കര ഈസ്റ്റ് ലോക്കല് കമ്മിറ്റിയംഗം എം എം അന്വറിനാണ് ജില്ലാ ഭരണകൂടം പത്തര ലക്ഷം രൂപ പ്രളയ ദുരിതാശ്വാസമായി അനുവദിച്ചത്. തട്ടിപ്പ് പുറത്തുവന്നതിന് പിന്നാലെ അന്വറിനെയും സിപിഎം സസ്പെന്റ് ചെയ്തിരുന്നു . ജനുവരി 24നാണ് അയ്യനാട് സര്വ്വീസ് സഹകരണ ബാങ്കിലേക്ക് ഒന്നേ മുക്കാല് ലക്ഷം രൂപയുടെ അവസാന ഗഡു എത്തിയത് . ആകെ കിട്ടിയതില് നിന്ന് അന്വര് അഞ്ച് ലക്ഷം രൂപ പിന്വലിക്കുകയും ചെയ്തിരുന്നു. സംഭവം വിവാദമായതോടെ ജില്ലാ കളക്ടര് പണം തിരിച്ചുപിടിച്ചു.
