ഡല്ഹി : നഗരങ്ങളില് കുടുങ്ങിയ അന്തര്സംസഥാന തൊഴിലാളികള് ലോക്ക്ഡൗണ് നീട്ടിയതോടെ കൂടുതല് ദുരിതത്തിലായിരിക്കുകയാണ്. തെരുവില് കഴിയുന്ന പലരും സംഘടനകള് നല്കുന്ന ഒരു നേരത്തെ ഭഷണം മാത്രം കഴിച്ചാണ് ജീവന് നിലനിര്ത്തുന്നത്. ഡല്ഹിയിലെ യമുനാ നദിയുടെ തീരത്ത് കഴിയുന്ന തൊഴിലാളികള് ശ്മശാനത്തില് കൂട്ടിയിട്ടിരിക്കുന്ന പഴങ്ങള് പെറുക്കിയെടുക്കുന്ന ദയനീയമായ ദൃശ്യങ്ങളാണ് പുറത്തുവന്നിരിക്കുന്നത്. വെയിലത്ത് കൂട്ടിയിട്ടിരിക്കുന്ന വാഴപ്പഴങ്ങളില് ചീഞ്ഞുപോകാത്തവ തെരഞ്ഞെടുത്ത് ഇവര് ബാഗിലാക്കുകയാണ്. വാഴപ്പഴങ്ങള് പെട്ടന്ന് ചീഞ്ഞുപോകില്ലെന്നും അതിനാല് ഒന്നോ രണ്ടോ ദിവസം അത് കഴിച്ച് ജീവന് നിലനിര്ത്താമെന്നും അവര് പറയുന്നു.
ഡല്ഹിയിലെ പ്രധാന ശ്മശാനമായ നിഗംബോദ് ഘട്ടില് അന്തിമ ചടങ്ങുകളുടെ ഭാഗമായി ഉപേക്ഷിച്ച പഴങ്ങളാണ് കുടിയേറ്റ തൊഴിലാളികള് പെറുക്കി എടുക്കുന്നത്. ”ഞങ്ങള്ക്ക് സ്ഥിരം ഭക്ഷണം ലഭിക്കാറില്ല. അതുകൊണ്ടാണ് പഴങ്ങള് എടുക്കുന്നത്”- അലഗറില് നിന്നുള്ള തൊഴിലാളി പറയുന്നു. ലോക്ക്ഡൗണ് പ്രഖ്യാപിച്ചതോടെ തൊഴില് നഷ്ടപ്പെട്ട നൂറുകണക്കിന് തൊഴിലാളികള് നോര്ത്ത് ഡല്ഹിയില് യമുന തീരത്തും പാലത്തിന്റെ അടിയിലുമായാണ് അഭയം തേടിയിരിക്കുന്നത്. അടുത്തുള്ള ഗുരുദ്വാരയില് നിന്ന് നല്കുന്ന ഒരു നേരത്തെ ഭക്ഷണമാണ് ഇവരുടെ ജീവന് നിലനിര്ത്തുന്നത്. കുടിയേറ്റ തൊഴിലാളികള്ക്ക് പാര്പ്പിടവും ഭക്ഷണവും നല്കണമെന്ന് കേന്ദ്രസര്ക്കാര് നിര്ദേശമുണ്ടെങ്കിലും ഡല്ഹി, മുംബൈ നഗരങ്ങളില് ഇവര് ഒഴിഞ്ഞ സ്ഥലങ്ങളില് താമസിക്കുന്ന കാഴ്ചയാണുള്ളത്.
