ബാക്ടീരിയ സാന്നിദ്ധ്യമുണ്ടെങ്കിൽ ഷവർമ മനുഷ്യന്റെ ജീവനെടുക്കുന്ന വിഷമായേക്കും. ഷവർമയെ വിഷമയമാക്കുന്നത് പഴകിയ മാംസത്തിൽ വ്യാപിക്കുന്ന സ്റ്റഫൈലോ കോക്കസ് ബാക്ടീരിയയാണ്. ഈ ബാക്ടീരിയയുടെ സാന്നിദ്ധ്യമുള്ള മാംസം എത്ര വലിയ തീയിൽ വേവിച്ചാലും ബാക്ടീരിയ മാത്രമേ നശിക്കൂ. ആഹാരത്തിലെ വിഷാംശം നിലനിൽക്കും. കൈകാര്യം ചെയ്യുന്നവരുടെ കൈകളിൽ സ്റ്റഫൈലോകോക്കസിന്റെ സാന്നിദ്ധ്യമുണ്ടെങ്കിലും ഭക്ഷണം വിഷമയമാകും. ബാക്ടീരിയ കലർന്ന ഭക്ഷണം കഴിച്ചാൽ രണ്ടുമുതൽ ആറ് മണിക്കൂറിനകം ഭക്ഷ്യവിഷബാധയുടെ ലക്ഷണങ്ങൾ പ്രകടമാകും. ഷവർമ കഴിച്ച് രണ്ടോ മൂന്നോ ദിവസത്തിനു ശേഷം ഭക്ഷ്യവിഷബാധയുണ്ടായാൽ കുറ്റം ഷവർമയുടെ മേൽ കെട്ടിവെയ്ക്കരുതെന്ന് സാരം.
ഷവർമയ്ക്കൊപ്പം വിളമ്പുന്ന മയണൈസിലും മാരക ബാക്ടീരിയകളുണ്ടാവാം. മുട്ടത്തോടിലുള്ള സാൽമൊണല്ല ബാക്ടീരിയയാണ് വില്ലൻ. മയണൈസ് തയ്യാറാക്കാൻ മുട്ടപൊട്ടിക്കുമ്പോൾ ബാക്ടീരിയ വെള്ളയിലേക്ക് കലരുന്നു. ഈ മുട്ട ചേർത്ത മയണൈസ് പാകം ചെയ്യാത്ത വിഭവമായതിനാൽ വിഷബാധ സാദ്ധ്യത നൂറിരട്ടിയാകും. മയണൈസ് പ്രോട്ടീൻ സമ്പന്നമായതിനാലും ബാക്ടീരിയ വേഗത്തിൽ വ്യാപിക്കും. റസ്റ്റോറന്റുകളും ഹോട്ടലുകളും ഫുഡ് ട്രക്കുകളും തലേന്നത്തെ മയണൈസ് ഫ്രിഡ്ജിൽ വെച്ച് പിറ്റേന്ന് വിളമ്പാറുണ്ട്. ഇത് കൂടുതൽ അപകടകരമാണ്. ഭക്ഷ്യവിഷബാധയുടെ സാഹചര്യത്തിൽ ആരോഗ്യവകുപ്പ് പച്ചമുട്ട ചേർത്ത മയണൈസ് നിരോധിച്ചിരുന്നു.
