തിരുവനന്തപുരം : കല്ലുവാതുക്കലിലെ അങ്കണവാടി കുട്ടികള്ക്ക് ഭക്ഷ്യവിഷബാധയേറ്റ സംഭവത്തില് ജീവനക്കാര്ക്കെതിരെ നടപടിയെടുത്തു. അങ്കണവാടി വര്ക്കര് ഉഷാകുമാരിയെയും ഹെല്പ്പര് സജ്ന ബീവിയെയും സസ്പെന്ഡ് ചെയ്തു. ചൈല്ഡ് ഡവലപ്മെന്റ് പ്രോജക്ട് ഓഫീസറുടേതാണ് നടപടി. പ്രാഥമിക അന്വേഷണത്തില് ഇരുവരും കുറ്റക്കാരാണെന്ന് കണ്ടെത്തിയിരുന്നു. ഇതേ തുടര്ന്നാണ്, സസ്പെന്ഷന്. അങ്കണവാടിയില്നിന്നു ഭക്ഷണം കഴിച്ചാണ് കുട്ടികള്ക്ക് ഭക്ഷ്യവിഷബാധയേറ്റതെന്ന് രക്ഷിതാക്കള് ആരോപിച്ചിരുന്നു. അങ്കണവാടിയിലെ നാല് കുട്ടികളാണ് ചികിത്സ തേടിയത്. തുടര്ന്ന്, നാട്ടുകാരും രക്ഷിതാക്കളും ചേര്ന്ന് നടത്തിയ പരിശോധനയില് അങ്കണവാടിയില് നിന്ന് പുഴുവരിച്ച അരി കണ്ടെത്തിയിരുന്നു.
