കോന്നി : അരുവാപ്പുലം ഗ്രാമ പഞ്ചായത്തിലെ കൊക്കാത്തോട് – കാഞ്ഞിരപ്പാറ – വിളക്കുപടി നിവാസികൾ കഴിഞ്ഞ മൂന്ന് പതിറ്റാണ്ടുകളിൽ ഏറെ കാലമായി കാത്തിരുന്ന നടപ്പാലം യാഥാർഥ്യമായി.നെല്ലിക്കപ്പാറ വാർഡിൽ കോട്ടാംപാറയിൽ നിന്ന് ഉത്ഭവിക്കുന്ന കൊക്കാത്തോട് വലിയ തോട്ടിൽ മഴക്കാലമായാൽ ജല നിരപ്പ് ക്രമാതീതമായി ഉയർന്ന് ഇരുകരകളും കവിഞ്ഞ് ഒഴുകുന്ന സ്ഥിതിയാണ് ഉള്ളത്.ഇവിടെ ഒരു നടപ്പാലം വേണം എന്ന് കഴിഞ്ഞ മുപ്പത്തഞ്ച് വർഷമായി പ്രദേശത്തെ ജനങ്ങൾ ആവശ്യം ഉന്നയിക്കുകയായിരുന്നു.ഈ ആവശ്യമാണ് അരുവാപ്പുലം ഗ്രാമ പഞ്ചായത്ത് ഭരണ സമിതി യാഥാർഥ്യത്തിൽ എത്തിച്ചിരിക്കുന്നത്.
നാല്പത് വർഷങ്ങൾക്ക് മുൻപ് ഇവിടെ ഉണ്ടായിരുന്ന കോൺക്രീറ്റ് റോഡ് ശക്തമായ മലവെള്ള പാച്ചിലിനെ തുടർന്ന് നശിച്ച് പോയിരുന്നു.ഇതിനെ തുടർന്ന് നാട്ടുകാരുടെ യാത്ര ദുരിതപൂർണ്ണമായതിനെ തുടർന്നാണ് അരുവാപ്പുലം ഗ്രാമ പഞ്ചായത്ത് ധനകാര്യ ഫണ്ട് ഉപയോഗിച്ച് നടപ്പാലം നിർമ്മിച്ചത്.അഞ്ച് ലക്ഷം രൂപ മുതൽ മുടക്കിൽ നിർമ്മിച്ചിരിക്കുന്ന പാലം നിർമ്മാണം പൂർത്തീകരിച്ചത്തോടെ പ്രദേശവാസികളുടെ ഏറെകാലത്തെ യാത്രാ ദുരിതത്തിനാണ് പരിഹാരമായത്.
