കഴക്കൂട്ടം: പാല് വണ്ടിയില് കടത്തിക്കൊണ്ടുവന്ന 50 ലക്ഷം രൂപ വിലയുള്ള വിദേശമദ്യം തൃശൂരില് പോലീസ് പിടികൂടിയ സംഭവത്തില് അറസ്റ്റിലായ പ്രതിയുടെ വീട്ടില് കഴക്കൂട്ടം എക്സൈസ് നടത്തിയ റെയ്ഡില് ഒളിപ്പിച്ചുവെച്ചിരുന്ന വിദേശ മദ്യം പിടികൂടി. കോണ്ഗ്രസ് പ്രാദേശിക നേതാവിന്റെ മകന് കുളത്തൂര് മുക്കോലയ്ക്കല് വിജയമ്മ ടവര് പുളിമൂട് തെക്കേവിളാകം വീട്ടില് കൃഷ്ണപ്രകാശിന്റെ (24) വീട്ടില്നിന്നാണ് അന്തര്സംസ്ഥാന വിദേശമദ്യ ശേഖരം പിടികൂടിയത്. തിരുവനന്തപുരം എക്സൈസ് ഇന്റലിജന്സ് ആന്ഡ് ഇന്വെസ്റ്റിഗേഷന് ബ്യൂറോയുടെ നിര്ദേശത്തിന്റെ അടിസ്ഥാനത്തില് കഴക്കൂട്ടം എക്സൈസ് ഇന്സ്പെക്ടര് എസ്. സുധീഷ് കൃഷ്ണയുടെ നേതൃത്വത്തിലാണ് റെയ്ഡ് നടത്തിയത്.
തിങ്കളാഴ്ച പുലര്ച്ചയാണ് പാല് വണ്ടിയില് മദ്യം കടത്തവേ തൃശൂര് വാടാനപ്പള്ളിയില് വെച്ച് കൃഷ്ണപ്രകാശ് പോലീസ് പിടിയിലായത്. ഇയാള്ക്കൊപ്പം കൊല്ലം സ്വദേശിയും പിടിയിലായി. പോലീസിന് ലഭിച്ച രഹസ്യവിവരത്തിന്റെ അടിസ്ഥാനത്തില് വാടാനപ്പള്ളി ഡിവൈ.എസ്.പിയുടെ നേതൃത്വത്തില് നടത്തിയ പരിശോധനയിലാണ് 3600 ലിറ്റര് വിദേശമദ്യ ശേഖരം പിടികൂടിയത്. ഓണക്കാലത്ത് വില്പന നടത്താന് പുതുച്ചേരിയില്നിന്ന് തിരുവനന്തപുരത്തേക്ക് കടത്തിക്കൊണ്ടുവന്ന മദ്യമാണ് പിടികൂടിയത്. പ്രതികള് ഇതിനു മുമ്പും മദ്യം വന് തോതില് കടത്തിയതായി പോലീസിന് വിവരം ലഭിച്ചിട്ടുണ്ട്. സംഘത്തില് കൂടുതല് പ്രതികള് ഉള്പ്പെട്ടതായി സംശയിക്കുന്നെന്ന് എക്സൈസ് സംഘം പറഞ്ഞു.
