കോട്ടയം: ലോക്ക്ഡൗണ് ദിവസങ്ങളിലും ഡ്രൈ ഡേ ആയ ഒന്നാം തീയതികളിലും വില്പന നടത്താനായി സൂക്ഷിച്ചിരുന്ന നൂറ് ലിറ്ററിലധികം വിദേശ മദ്യം പോലീസ് പിടികൂടി. 211 കുപ്പിയിലായി 105.5 ലിറ്റര് വിദേശ മദ്യവുമായി പൊന്കുന്നത്തെ ശ്യാം ഹോട്ടല് ഉടമ കൂരാലി അരീപ്പാറയ്ക്കല് ശരത്തിനെയാണ് (30) പൊന്കുന്നം പോലീസ് പിടികൂടിയത്. ബിവറേജുകളില് നിന്ന് മൂന്നു ലിറ്റര് വീതം മദ്യം വാങ്ങി ഇയാള് സൂക്ഷിക്കുമായിരുന്നു. തുടര്ന്ന് മദ്യം ലഭിക്കാത്ത ദിവസങ്ങളില് കൂടിയ വിലയ്ക്ക് മദ്യം വിതരണം ചെയ്യുകയായിരുന്നു പതിവ്.
420 രൂപ വിലയുള്ള ഒരു കുപ്പി മദ്യം 600 രൂപയ്ക്കാണ് ഇയാള് വിറ്റിരുന്നത്. കഴിഞ്ഞ ഞായറാഴ്ച ലോക്ക്ഡൗണ് ദിവസം ഇയാള് മദ്യം വിതരണം ചെയ്തിരുന്നതായി പോലീസ് സംഘത്തിന് വിവരം ലഭിച്ചിരുന്നു. ഇതേ തുടര്ന്ന് ജില്ലാ പോലീസ് മേധാവി ഡി.ശില്പയുടെ നിര്ദേശാനുസരണം കാഞ്ഞിരപ്പള്ളി ഡി.വൈ.എസ്.പി എന്.ബാബുക്കുട്ടന്റെ നേതൃത്വത്തില് ദിവസങ്ങളായി പ്രദേശത്ത് നിരീക്ഷണം നടത്തി വരികയായിരുന്നു. ഇതേ തുടര്ന്നാണ് ലോക്ക് ഡൗണ് ദിവസമായ ഞായറാഴ്ച മദ്യം സൂക്ഷിച്ചിരിക്കുന്നതായി കണ്ടെത്തിയത്. ഞായറാഴ്ച ഉച്ചയ്ക്ക് പന്ത്രണ്ടരയോടെ ഇയാളുടെ ഉടമസ്ഥതയിലുള്ള ശ്യാം ഹോട്ടല് റെയ്ഡ് ചെയ്ത് മദ്യം പിടിച്ചെടുക്കുകയായിരുന്നു.
