ഇറ്റലി : ഇറ്റാലിയന് മുന് മധ്യദൂര ഓട്ടക്കാരന് ഡൊണാറ്റോ സാബിയ (56) കൊവിഡ് ബാധിച്ച് മരിച്ചു. സാബിയയുടെ അച്ഛനും ഏതാനും ദിവസങ്ങള്ക്ക് മുന്പ് കൊവിഡ് ബാധിച്ച് മരിച്ചിരുന്നു. പുരുഷന്മാരുടെ 800 മീറ്റര് ഓട്ടത്തില് രണ്ട് തവണ ഒളിമ്പിക്സില് ഫൈനലില് പ്രവേശിച്ച താരമാണ് സാബിയ.
കൊവിഡ് ബാധിച്ച് കുറച്ചു ദിവസങ്ങളായി സാബിയ തെക്കന് ഇറ്റലിയിലെ ബാസിലിക്കാറ്റയിലെ സാന് കാര്ലോയിലെ ആശുപത്രിയില് ചികിത്സയിലായിരുന്നു. ഇറ്റാലിയന് ഒളിമ്പിക് കമ്മറ്റിയാണ് സാബിയയുടെ മരണവിവരം പുറത്തു വിട്ടത്. ലോകത്താകെ പിടിച്ചു കുലുക്കിയ കൊവിഡ് മൂലം മരിക്കുന്ന ആദ്യ ഒളിമ്പിക്സ് താരമാണ് സാബിയ എന്ന് കമ്മിറ്റി പറഞ്ഞു.
1984 ലോസ് ആഞ്ജലീസ് ഒളിമ്പിക്സിലും 1988 ലെ സോള് ഒളിമ്പിക്സിലും 800 മീറ്ററില് സാബിയ ഫൈനലില് പ്രവേശിച്ചിരുന്നു. അഞ്ചാമതും ഏഴാമതുമാണ് അദ്ദേഹം രണ്ട് മത്സരങ്ങളില് ഫിനിഷ് ചെയ്തത്. 1984 യൂറോപ്യന് ചാമ്പ്യന്ഷിപ്പില് ഇതേ ഇനത്തില് സ്വര്ണ്ണം നേടിയിട്ടുണ്ട്.